As reunións serán trimestrais e a primeira terá lugar o vindeiro mércores, 25 de outubro, na cafetería New York en Bertamiráns. Os lugares nos que se celebren os encontros serán sempre públicos para darlle visibilidade á actividade e a Plataforma. Co fin de poder organizar a actividade, que é de balde, será preciso inscribirse no correo electrónico vocesdemuller@gmail.com.

Os libros serán sempre curtos e en cada encontro decidirase cal será o seguinte que se lerá. Para este primeiro encontro elixiuse a obra Todos deberíamos ser feministas, da autora nixeriana Chimamanda Ngozi. Un libro que recolle o transcendental e emblemático discurso que deu  a autora na súa TEDx Talk sobre o que significa ser feminista no século XXI. Este libro pode atoparse na biblioteca municipal. As persoas que o queiran mercar deben saber que ten un prezo de arredor de seis euros.

Chimamanda Ngozi, Todos deberíamos ser feministas
Chimamanda Ngozi Adichie é unha escritora nixeriana que trata na súa obras temas como o racismo, a emigración ou, como é o caso o feminismo. O seu pai foi profesor na primeira universidade de Nixeria e a súa nai a primeira secretaria da institución. El conseguiu unha beca para estudar nos Estados Unidos e ten varios libros publicados.

En Todos deberíamos ser feministas, Chimamanda di “hoxe gustaríame pedir que empecemos a soñar cun plan para un mundo distinto. Un mundo máis xusto. Un mundo de homes e  mulleres máis  felices e máis honestos consigo mesmos. E esta é a forma de empezar:  temos que criar ás nosas fillas doutra forma. E tamén aos nosos fillos”.