A xornada comezará ás 10:15 horas, cunha dinámica de interacción entre os equipos participantes, co obxectivo de que se coñezan, interrelacionen entre eles e o nerviosismo diminúa. Os encontros entre equipos produciranse a partir das 10:50 horas. Os primeiros grupos en debater serán os “Falabaratos festeiros” (IES Terra de Xallas) e o IES de Canido. A continuación, será a quenda de “Xente que fala” (IES do Milladoiro) e “Peripatéticas” (IES Xulián Magariños). Para rematar a mañá, participarán “Ames a palabra” (IES de Ames) e o CEIP Eusebio Lorenzo Baleirón.

Durante a tarde, continuarán os debates e os equipos defenderán unha posición diferente á da mañá. Celebraranse un total de seis debates, e cada equipo deberá argumentar a favor e en contra do tema escollido para a final: “A mocidade renuncia ao galego?”. Finalmente, arredor das 18:45 horas coñecerase a decisión do xurado e realizarase a entrega de premios.

Nesta ocasión, o xurado estará formado por Carme Pereiro, técnica de normalización lingüística de Carballo; Alberto Ramos, especialista en comunicación, xornalista e escritor; Rocío Loureiro, licenciada en Filoloxía Galega e colaboradora en anteriores edicións do certame; María Estévez, investigadora María Zambrano na USC, tradutora e especialista en mediación lingüística; e María Caamaño, profesora de Ciencias da Educación da USC, especialista en expresión dramática e oralidade. Para outorgar as puntuacións, teranse en conta cuestións como a calidade e a orixinalidade dos argumentos, a capacidade de refutación e interacción co equipo contrario, a comunicación non verbal, a capacidade de oratoria e improvisación, o traballo en equipo e a calidade lingüística. O equipo que acade maior puntuación levará como premio unha viaxe en grupo dunha fin de semana.