Invisibles é un espectáculo de creación colectiva que parte da novela homónima de Monste Fajardo para presentar ante o público diversas historias de mulleres galegas vítimas de violencia de xénero. A través destas historias, algunhas delas coñecidas pola súa repercusión mediática, buscarase poñer sobre a mesa a inexistencia dun perfil común entre as vítimas deste tipo de violencia e, por outra banda, denunciar a invisibilidade dos agresores fronte á exposición das vítimas ante a sociedade.

Redrum Teatro é a encargada de traer a Ames esta peza, destinada a maiores de doce anos debido á crueza dalgunha das situacións que se representan. Dirixida por Marián Barallobre, o espectáculo conta coas actuacións de Mela Casal, Nieves Rodríguez e Sheyla Fariña.

Antes do inicio da obra, a asesora xurídica do CIM de Ames, Maite Arufe, presentará á Sheyla Fariña, que será a encargada de realizar unha pequena charla na que contextualizará a obra e falará de como xurdiu. Esta actividade forma parte dunha serie de accións organizadas pola Concellaría de Servizos Sociais e Igualdade durante a campaña Ames en Negro, co obxectivo de concienciar sobre a violencia de xénero.

As entradas para asistir a este espectáculo xa están dispoñibles a través da Billeteira electrónica, mentres que só un 10% se reservarán, como é habitual, para vender de xeito presencial unha hora antes do comezo do espectáculo. O custo das entradas é de cinco euros, con descontos do 50% para persoas maiores de 65 anos, menores de 12 e estudantes con carné.

Contido relacionado

Compostela 24 horas: "A peza de teatro "Invisibles" represéntase na Casa da Cultura do Milladoiro"