Coa celebración do “XII campionato de Galicia 5K Ruta” Ames converteuse na mañá do pasado domingo na capital do ateltismo galego. 397 atletas federados correron polo circuíto homologado que partiu e chegou á rúa alcalde Lorenzo. O campionato disputouse con saídas escalonadas de dez atletas a intervalos de medio minuto. Ames foi a primeira sede do campionato.

Uxía Pérez do Playas de Castellón cun rexistro de 17:42 e Pablo Bocelo do Coruña Comarca con 14:57, proclamáronse campións absolutos da proba. Xunto eles ocuparon postos de medalla Tina Fernández do Atletismo Sar e Sandra Mosquera do Comesaña na categoría feminina Na masculina destacaron Anxo Castro do A.C. Cerne e Simón Ganzález do Ría de Foz. Cómpre salientar asemade os récords galegos acadados por Hugo Souto na categoría Sub20; Tina Fernández na F35; Domingo Alvarez M70 e Angeles Ripoll na F60. Podes consultar todos os resultados da proba aquí.

“Foi moi gratificante asistir a esta proba e non só polo que supuña ver a preto de 400 atletas federados competindo en Ames, senón tamén porque a celebración deste campionato supón unha especie de volta á normalidade e isto notábase na rúas, notábase a alegría da xente e esas gañas que todos temos de que a actividade deportiva volva a ser o que era antes da pandemia” manifestou a concelleira de deportes Susana Señorís.

A concelleira agradeceu á presenza do presidente da Federación Galega de Atletismo, Isidoro Hornillos, e de Iván Sanmartín “non só pola asistencia ao campionato, senón por todo o apoio recibido con anterioridade para a preparación da proba”. Señorís tamén tivo palabras de agradecemento para os traballadores da Brigada Municipal, a Policía Local, Protección Civil, os clubes de atletismo do concello, Ames Atletismo, Millaraio e Atletismo Sar “que axudaron ao reparto dos dorsais, ao avituallamento e ás marcaxes de saída”. Tamén se lembrou do técnico de Deportes Alberto Viaño “que non parou en toda a mañá, logo dunha semana verdadeiramente intensa…”, de Terio Carrera que fixo de animador da proba, do fotógrafo Víctor Hugo e do alcalde Blas Garcia e compañeiros de Corporación que acudiron á proba e compartiron no podium a entrega de medallas. Rematou A concelleira de deportes o capítulo de agradecementos facendo alusión aos 397 inscritos no campionato: “xa que sen a súa participación e ilusión está proba non se podería ter levado a cabo”.

Novas relacionadas

Revista AmesGO: "Domingo de atletismo en Bertamiráns"