Este programa enmárcase na convocatoria de subvencións da Consellería de Política Social da Xunta de Galicia. O seu obxectivo é a promoción de actividades que favorezan o desenvolvemento persoal e profesional das mozas e dos mozos que participen, ao mesmo tempo que eles e elas contribúen a mellorar a calidade vida da comunidade.

Os oitos voluntarios e voluntarias terán entre 16 e 30 anos. Eles e elas axudarán colaborando con actividades como o citado Campamento urbano da Aula da Natureza. Serán os e as encargadas de colaborar no deseño, programación, execución e avaliación das actividades do campamento, sempre supervisados e en contacto cos e coas responsables da OMIX e da propia Aula da Natureza. Acompañarán a nenas e nenos de entre 6 e 14 anos inscritos no campamento, que terá lugar entre os días 4 e 15 de xullo en horario de 16:00 a 20:00 horas. Tamén traballarán pola mañá, en actividades de organización. O campamento foi concibido para que os rapaces e as rapazas de Ames pasen tardes divertidas á vez que educativas na época de verán, a través de obradoiros, xogos e excursións sempre conectados co medio ambiente e a natureza.

A través deste programa búscase apoiar a participación xuvenil da mocidade, reforzar o seu compromiso coa comunidade e formalos en actividades relacionadas co lecer e o medio ambiente. Isto último potenciará a súa capacitación e formación de cara a futuras oportunidades educativas ou laborais. O traballo realizado contribúe a aumentar as súas posibilidades laborais, ao valorarse positivamente as labores de voluntariado. O voluntariado fomenta ademais a creación de lazos sociais, o traballo en equipo e a interrelación entre iguais. Ao remate do programa de voluntariado as persoas participantes recibirán un diploma expedido pola Dirección Xeral de Xuventude e Voluntariado da Xunta de Galicia.

Contido relacionado

El Correo Gallego: "Ocho jóvenes voluntarios para actividades estivales en Ames"