Volve o campamento sénior Amessán que está dirixido a persoas de 60 anos en diante e que estean empadroadas no concello de Ames. Despois do éxito que tivo a edición pasada, a Concellaría de Saúde e Benestar Social volver organizar esta iniciativa que se desenvolverá durante os martes e xoves do mes de xullo. Esta actividade amplía a programación do programa Amessán, que está dirixido a persoas maiores de 60 anos empadroadas no concello de Ames.

Os martes faranse actividades en exterior: no Pazo da Peregrina, en Bertamiráns, e na contorna da piscina municipal do Milladoiro. Ademais, os xoves faranse catro visitas a San Xusto; ao mercadiño de Noia; ao pico de Santa Mariña, no Barro; e á praia fluvial Praíña. Na praia fluvial Praíña farase a despedida do programa cun xantar.

O prazo de inscrición para participar neste campamento xa está aberto. Para elo hai que enviar un correo electrónico ao enderezo voluntariado@concellodeames.gal ou chamar ao número de teléfono 662 377 044. Terán preferencia no proceso de inscrición as persoas que participaron no programa Amessán ao longo do curso 2021-2022.

A concelleira de Saúde e Benestar Social, Luísa Feijoo, explicou que “parécenos moi boa idea seguir apostando por este campamento sénior de verán, para que aquelas persoas maiores de 60 anos que o desexen, teñan actividade no exterior e participen en saídas durante o mes de xullo. O obxectivo é que tamén durante o verán se manteñan activos, ocupados e interactúen con outras persoas. O ano pasado o campamento sénior tivo moi boa acollida, polo que animamos a todas aquelas persoas que estean interesadas a que se inscriban na edición de 2022”.

Novas relacionadas:

El Correo Gallego: "Abren as anotacións para o campamento Amessán dirixido a maiores de 60"