Dende este xoves 13 de xuño e ata o luns 15 de xullo está aberta a convocatoria de axudas ás familias numerosas de Ames, cuxa contía ascende neste exercicio aos 100.000 euros, destinados ao apoio económico destas unidades familiares, á fixación de poboación e á continuidade do crecemento demográfico do concello. Neste senso, poden optar a estas subvencións as familias que teñan fixada a súa residencia habitual en Ames, con ao menos un ano de antigüidade ininterrompido, e que cumpran cos criterios de familia numerosa da Consellería de Política Social da Xunta de Galicia ou doutros organismos similares doutras comunidades autónomas.

Requisitos de renda e patrimonio
Como máximo, cada unidade de convivencia poderá recibir ata 1.200 euros, dependendo da renda, do patrimonio e da cantidade de membros da familia. Será preciso presentar a declaración do IRPF do exercicio 2023.

Deste xeito, as familias solicitantes non deberán superar os 14.108,01€ anuais, no caso de teren 3 fillos; os 16.734,20€ no caso de teren 4; os 18.990,57€ de teren 5; os 21.168,97€ de teren 6; os 23.227,84 de teren 7; e os 25.274,65 de teren 8. As familias con máis de 8 fillas ou fillos non deberán superar os 1.803,73 adicionais por membro.

No referente ao patrimonio, este debe estar valorado en menos de 36.636,52 €, no caso de teren 3 fillos; en menos de 44.777,96€ no caso de teren 4; en menos 52.919,41€ de teren 5; en menos de 61.060,86€ de teren 6; en menos de 69.202,31 de teren 7; e en menos de 77.343,76 de teren 8. As familias con máis de 8 fillas ou fillos non deberán superar os 8.141,45 por cada membro adicional.

No caso de que un dos proxenitores se atope traballando fóra da Comunidade Autónoma de Galicia, e non figure empadroado neste municipio, deberá acreditalo con copia do correspondente contrato de traballo e calquera outro documento que acredite a residencia efectiva. No caso das familias monoparentais, só se requirirá o empadroamento, dun ano de antigüidade, do pai ou nai que teña a custodia das fillas ou fillos. Unha condición que tamén se lle aplica ás titoras e titores de menores de idade. De ningunha forma, poderán ser beneficiarias destas axudas persoas privadas da patria potestade das súas fillas ou fillos. Cando unha mesma ou mesmo menor dea lugar á expedición de dous títulos de familia numerosa, a axuda só será concedida á persoa que ostente a custodia.

Presentación de solicitudes
As solicitudes deberán presentarse ata o 15 de xullo a través da sede electrónica do Concello de Ames ou de xeito presencial nas oficinas de asistencia en materia de rexistro situadas na Casa do Concello e na oficina municipal do Milladoiro. Tamén se poden presentar as solicitudes a través de calquera outro dos medios ao que se refira o artigo 16 da Lei 39/2015 do 1 de outubro de Procedemento Administrativo Común das Administracións Públicas.

>>ACCEDE AO TRÁMITE PREMENDO NESTA LIGAZÓN.

Novas relacionadas:

El Correo Gallego: "Ames premia la natalidad e incentiva el aumento de población con 100.000 euros para subvencionar a sus familias numerosas"