[04-09-2018] O Concello de Ames aprobou as bases da convocatoria de axudas para as actividades realizadas polas ANPAS dos centros educativos amesáns ao longo do exercicio 2017. A contía máxima destinada a esta convocatoria de axudas ascende a 20.000 euros. As solicitudes para participar nesta convocatoria poderán presentarse no prazo dun mes a contar dende este martes 4 de setembro (hoxe incluído). A través destas achegas poderase sufragar ata o 100% do orzamento total asignado a cada centro escolar para as viaxes culturais, as actividades extraescolares, a organización de encontros e xornadas e a adquisición de mobiliario e material didáctico. Premendo no enlace que está a túa dereita, baixo o apartado de descargas, poderás obter as bases e os impresos de solicitude destas axudas.
O goberno municipal acaba de aprobar a convocatoria da liña de axudas para sufragar as actividades levadas a cabo polas ANPAS durante o exercicio 2017. Para este fin destínase un total de 20.000 euros. Poderán optar a estas subvencións as ANPAS existentes nos centros educativos de titularidade pública do Concello de Ames, legalmente constituídas, e que figuren inscritas no Rexistro Municipal de Asociacións, sempre e cando os datos da inscrición estean debidamente actualizados ao momento de solicitar a achega. Os conceptos subvencionables son os de viaxes culturais, actividades extraescolares, organización de encontros e xornadas e mailo de mobiliario e material didáctico.
Entre os obxectivos principais desta convocatoria de axudas sobresae o enriquecemento da formación da poboación escolar do Concello de Ames, a través de actividades complementarias á formación regrada que reciben nos centros educativos, así como o fomento da convivencia do alumando fóra do ámbito puramente académico. Ademais, tamén se busca propiciar unha mellora do rendemento por parte da poboación escolar.
A través destas axudas as ANPAS poderán sufragar ata o 100% dos gastos que lle supoñan as saídas culturais, as actividades extraescolares, os encontros e xornadas, así como o mobiliario e o material didáctico (exercicio 2017). Consideraranse saídas culturais aquelas que inclúan no seu desenvolvemento a visita a lugares ou a asistencia a eventos de carácter histórico ou artístico. As actividades extraescolares serán aquelas que se desenvolvan con carácter estable ao longo dun período similar ao do curso escolar.
As xornadas e encontros serán aquelas orientadas á mellora do coñecemento e convivencia do alumando e das nais e pais. Todas estas actividades deberán ir dirixidas ao alumando do centro de ensino que solicita a axuda. Pola súa banda, enténdese como mobiliario e material didáctico todos aqueles elementos necesarios para o desenvolvemento da actividades da ANPAS, como poden ser mesas, cadeiras, taboleiros, libros, revistas e material escolar.
Contía individual das achegas
As axudas aos centros públicos de máis de 500 alumnas/os, non poderán superar os 3.000€; as axudas aos centros entre as 150 e as 500 alumnas/os terán un máximo de 2.000€ por centro; e por último, aquelas que recaian nos centros públicos de menos de 150 alumnas/os, non poderán superar os 750€.
As solicitudes deberán presentarse no rexistro xeral do Concello de Ames ou en calquera outro rexistro público. O prazo para a presentación de solicitudes é dun mes a contar dende o día seguinte á publicación do extracto desta convocatoria no BOP. Debido a que o anuncio no BOP saíu publicado este luns 3 de setembro, as solicitudes xa se poden presentar dende esta martes 4 de setembro. As solicitudes deberán achegarse nos modelos normalizados correspondentes, que poden obterse nas dependencias do departamento de Educación. Tamén se poden descargar nesta nova e na sección de Convocatorias da web municipal. En caso de solicitar axudas para varias actividades, deberá encherse un modelo de solicitude para cada unha delas.