O Concello de Ames, a través da Concellaría de Deportes, volve apostar pola promoción dos/as deportistas individuais do municipio. Esta liña de axudas de bolsas púxose en marcha por primeira vez en 2024. Este ano dáselle continuidade a esta convocatoria de subvencións co obxectivo de promocionar o deporte local de Ames e axudar aos deportistas amesáns na consecución dos seus logros deportivos. Moitos destes atletas teñen dificultades para progresar en disciplinas individuais (olímpicas ou non olímpicas), especialmente nas etapas de formación.

A concelleira de Deportes, Susana Señorís, sinala que o obxectivo destas bolsas é “apoiar aos/as deportistas individuais de Ames, como medio para promover o deporte do municipio e, desta forma, conseguir logros deportivos para o concello”. Así, explica que “o que se pretende é axudar á práctica e ao rendemento deportivo, tanto en relación ao perfeccionamento técnico e á obtención de maior rendemento nas respectivas modalidades deportivas, como facilitando a súa participación en competicións deportivas de alto nivel”.

A presente convocatoria de bolsas ten por obxecto apoiar a práctica e ao rendemento deportivo, así como posibilitar a participación dos/as deportistas do concello en eventos deportivos, facilitándolles o acceso a unha preparación integral idónea. Ten a consideración de deporte de carácter individual todo aquel deporte que, segundo a súa regulamentación, é practicado por unha ou dúas persoas como máximo. Só será subvencionable unha única modalidade deportiva por solicitante e convocatoria.

Beneficiarios/as das axudas
Poderán solicitar bolsas as persoas que cumpran os seguintes requisitos:
1.-Ter condición de deportista na práctica dalgún deporte olímpico ou non olímpico. Este requisito acreditarase mediante certificado de licenza expedido pola federación correspondente.
2.-Estar empadroado no Concello de Ames, cunha antigüidade mínima de dous anos, desde o momento da solicitude da bolsa.
3.-Ter licenza federativa durante o ano 2025.
4.-Acreditar nivel deportivo na modalidade practicada e ter proxección nas previsións de futuro.
5.-Estar ao corrente das obrigas fiscais co Concello de Ames, así como das obrigas coa Axencia Tributaria e a Seguridade Social.
6.-Non estar cumprindo sanción firme por infracción disciplinaria ou administrativa en materia deportiva, cualificada como grave ou moi grave.
7.-Non poderán obter a condición de persoa beneficiaria os/as deportistas que participen en competicións de carácter oficial por equipos en formato de ligas regulares.
8.-Idade dos/as deportistas: dos 12 aos 23 anos (persoas deportistas nadas desde o 1 de xaneiro de 2002 ata o 31 de decembro do 2013).

No caso das persoas deportistas menores de idade, a persoa solicitante será sempre o/a menor, e a persoa representante (persoa que obrigatoriamente presenta a solicitude e a documentación) será o pai, nai ou titor legal do/a menor, que, ademais, se responsabilizará de todas as obrigas derivadas de que o seu fillo ou filla sexa titular/beneficiario/a da bolsa.

Todas as persoas deportistas que obteñan bolsa deberán publicitar a axuda utilizando o logo do Concello de Ames.

Dotación económica
A contía máxima destinada a esta convocatoria ascende a 10.000 euros. O importe individual das achegas concedidas non poderá superar os 700 euros. Estas bolsas serán compatibles con outras axudas públicas ou privadas para a mesma finalidade, que lle deberán ser comunicadas ao Concello de Ames.

Presentación de solicitudes
O prazo para presentar as solicitudes será de 1 mes a contar desde o día seguinte á publicación da convocatoria no Boletín Oficial da Provincia da Coruña. En caso de rematar nun dia inhábil, este prazo entenderase prorrogado ata o inmediato hábil seguinte. O extracto do acordo da Xunta de Goberno Local de dita convocatoria foi publicado no BOP o mércores 19 de marzo.

A solicitude, xunto coa documentación que corresponda, poderá presentarse a través do rexistro telemático na Sede electrónica do Concello, nas oficinas de asistencia en materia de rexistro do Concello de Ames (localizadas na casa do Concello en Bertamiráns e na oficina municipal do Milladoiro), ou a través de calquera dos medios ao que se refira o artigo 16 da Lei 39/2015 do 1 de outubro de Procedemento Administrativo Común das AAPP.

Novas relacionadas:

AMSGO!: "A Xunta de Goberno Local aproba unha nova liña de achegas para a concesión de bolsas para deportistas do concello de Ames no 2025"