O IES de Ames participa un programa bianual de intercambio con alumnos/as de Estados Unidos. Primeiro foron os rapaces e rapazas amienses os que visitaron Nova Orleáns durante os meses de setembro e outubro e agora tocoulle a quenda ás 15 alumnas americanas, que chegaron a Ames o pasado 10 de marzo, despois de estar en Madrid, Toledo e Salamanca. Estas rapazas, que pasarán dez días en Ames, están acompañadas de dúas profesoras.

Ao chegar a Ames quixeron coñecer as dependencias da Casa do Concello. As alumnas e as dúas profesoras, que as acompañan, visitaron os diferentes departamentos da casa consistorial e remataron a súa visita no salón de plenos. Neste lugar foron recibidos polo alcalde de Ames, Carlos Fernández, que estivo falando con elas sobre a experiencia vivida en Ames. Os rapaces tamén lle puideron preguntar ao alcalde sobre o funcionamento da actividade municipal. O alcalde estivo acompañado polas coordinadoras do departamento de Educación e polos concelleiros e concelleiras do grupo de goberno.

As rapazas e profesoras americanos estiveron acompañados por diferentes profesores do IES de Ames, por tres alumnos/as que cursan os seus estudo neste centro de ensino e que exerceron de anfitrións, e pola directora do centro educativo, Marisol Louro. Ao final do acto as alumnas recibiron de mans do alcalde un pequeno detalle para que lembren a súa visita ao concello de Ames.