O Concello de Ames acollerá do 4 ao 13 de febreiro unha tripla exposición do artista santiagués Fran Riveiro, recoñecido pola forma artesanal na que realiza e plasma as súas obras. Deste xeito, exhibiranse algunhas das pezas e coleccións máis recoñecidas do artista. Unha parte da colección “Urbania” estará exposta na Casa da Cultura do Milladoiro, mentres que outra parte das obras exhibiranse no Pazo da Peregrina en Bertamiráns. Por outra banda, a colección “Coffe paints” poderá visitarse na Casa da Cultura de Bertamiráns.

Con esta tripla exposición, amósase unha pequena representación da longa traxectoria artística de Fran Riveiro, con máis de vinte anos ás súas costas. Cun estilo moi persoal e recoñecible, os visitantes poderán gozar desta mostra dun xeito dinámico, decidindo por eles mesmos que espazos expositivos visitar, creando eles mesmos a súa propia traxectoria.

Sobre Fran Riveiro
Fran Riveiro é un artista santiagués formado nas artes escénicas e audiovisuais e que, ademais, obtivo a Carta de Artesán na modalidade de ilustración e debuxo no ano 2013. Caracterízase por afrontar de forma totalmente artesanal o seu proceso creativo, expresando dun xeito único non só o mundo que nos rodea, se non o seu propio mundo interior.

Urbania
Para confeccionar esta colección, Fran Riveiro realizou unha profunda investigación artística ao longo de máis de vinte anos, baseada no “urbanismo plástico”. A través de diferentes técnicas pictóricas nas que se mesturan planos, arquitecturas urbanas ou mapas, a maneira de traballar as obras semella o do encaixe de bolillos.

Nestas pezas agóchanse múltiples mensaxes cifradas mediante a ilustración e que cada persoa pode descubrir ao observar cada detalle da obra. Deste xeito, “Urbania” invita á reflexión sobre o ritmo de vida diario e a interacción que temos co noso redor, así como afondar en nós mesmos.  

Coffe Paints
A colección “Coffe Paints”, como o seu propio nome indica, ten como fonte de inspiración e protagonista principal ao café. Empregando unha técnica especial con café líquido, Fran Riveiro crea unha diferentes pezas na que as siluetas e a lembranza semellan non ter final.

As imaxes plasmadas nesta colección están creadas cunha ou varias capaz de café, na que os tempos de secado son clave para poder optimizar este recurso e obter os resultados de intensidade axeitados. Con madeira compacta como soporte, o café fíxase nel case a modo de gravado. Ademais deste recurso tan habitual nas nosas vidas cotiás, tamén se empregan materiais como o grafito, tinta ou augarela para potenciar a imaxe feita en café e crear contrastes.