A saída está programada para o sábado día 14 de setembro, e desenvolverase entre as 9:15 horas e as 19:00 horas. No caso de Ames, haberá servizo de autocar dende a Casa da Cultura do Milladoiro e dende o Pazo da Peregrina de Bertamiráns. Os horarios e puntos de recollida son os seguintes:

Bus 1:
• Dodro - Pazo de Lestrove: 09:15 horas
• Padrón - Biblioteca: 09:30 horas

Bus 2:
• Ames (O Milladoiro) - Casa da Cultura: 09:30 horas
• Brión - Carballeira de Sta. Minia: 09:45 horas
• Ames (Bertamiráns) - Pazo da Peregrina: 10:00 horas

Durante o percorrido visitaranse os lugares pertencentes ao territorio destes concellos que marcaron a vida e a obra da nosa autora máis universal. A ruta comezará no Pazo da Peregrina, en Bertamiráns, continuando ata a Tarroeira, na parroquia de Ortoño, no concello de Ames. A seguinte parada terá lugar en Brión, e recalará na igrexa de Bastavales, cuxas campás protagonizan un dos seus versos máis afamados e soarán para o deleite das persoas participantes. Cara a hora do almorzo está prevista a chegada á vila de Padrón onde se dispoñerá de tempo libre para descansar e comer (a comida non está incluída). Xa pola tarde proseguirase o itinerario previsto polos concellos de Dodro e Padrón, visitando as Torres de Hermida, o Espolón e a casa onde Rosalía viviu con súa nai para finalizar na Casa Museo onde faleceu o día 15 de xullo do ano 1885.

Co obxectivo de poñer en valor estes lugares e achegalos á cidadanía, nesta ocasión configurouse unha experiencia tomando como base o seu valor paisaxístico e cultural engadindo información nova sobre a vida de Rosalía. Creouse un produto turístico a medida e específico, adaptado ás novas tendencias dun turismo cada vez máis “experiencial” no cal as persoas asistentes participan no proceso e conectan cos valores dos territorios que se visitan.

Ao remate da ruta, ao redor das sete da tarde, todas as persoas participantes e aquelas que queiran asistir ata completar o aforo poderán gozar dun concerto de Manoele de Felisa na igrexa de Santa María de Iria Flavia.

As inscricións son gratuítas e deberán realizarse a través desta ligazón dende hoxe ata o martes 10 de setembro. As prazas serán adxudicadas por orde de rexistro e deberase seleccionar o punto de saída e regreso do autocar.

Novas relacionadas:

El Correo Gallego: "Los ayuntamientos de Sar y A Maía llaman a visitar las huellas de Rosalía por sus comarcas"