Material promocional da ruta
As pegadas de Rosalía é un novo produto turístico e cultural que responde ás actuais demandas das viaxeiras e viaxeiros, como son a busca de inmersión en destino, o respecto á identidade do territorio, o contacto coa poboación local ou a protección do medio ambiente, entre outras. Para a difusión e promoción desta nova ruta creouse diferente material promocional (chapas, folletos informativos, mapas da ruta, mochilas, cartelería, etc) e un entorno web que recolle toda a información desta iniciativa.

Asemade, os rexedores dos tres concellos implicados nesta iniciativa agradecen a colaboración prestada durante o proceso de creación da ruta As pegadas de Rosalía por parte de Xosé Vizoso, autor do deseño da portada do material promocional, e por parte do presidente da Fundación Rosalía de Castro, Anxo Angueira, que tamén asistiu á presentación, pola cesión de imaxes e o material documental empregado.

O stand de Galicia en Fitur foi o escenario escollido para facer esta mañá a presentación oficial da nova ruta As pegadas de Rosalía, posta en marcha entre os Concellos de Ames, Brión e Padrón. A presentación deste novo produto turístico e cultural tivo moi boa acollida e contou con numeroso público. Entre os asistentes atopábanse varios alcaldes doutos concellos galegos e autoridades da Xunta de Galicia que estes días están en Madrid asistindo á Feira Internacional de Turismo.

A través desta iniciativa preténdese, en primeiro lugar, achegar a vida de Rosalía de Castro a toda a poboación, e ademais, desenvolver un itinerario cultural a partir dunha ruta xa existente deseñada polo intelectual dodrense Avelino Abuín de Tembra e que une os concellos de Santiago de Compostela, Ames, Brión, Padrón e Dodro. Dito itinerario está concibido para que as usuarias e usuarios poidan percorrelo en autobús, a pé ou en bicicleta e pasa por lugares como San Xoán de Ortoño (Ames), a igrexa de Bastavales (Brión), a colexiata de Iria Flavia (Padrón), o Pazo de Arretén (Padrón) e a Casa de Rosalía de Castro (Padrón).

O alcalde de Ames, José Miñones, explicou que “a presentación feita hoxe na Feira Internacional de Turismo, que se está celebrando en Madrid, está dirixida fundamentalmente aos profesionais do sector turístico. O principal obxectivo é intentar dar a coñecer esta nova ruta, para que as compañías que, posteriormente, van a promocionar o turismo de Galicia, a coñezan e a vendan xunto aos diferentes Camiños de Santiago existentes e a outras rutas que xa existían con anterioridade”.

O alcalde de Brión, José Luis García, incidiu en que “queremos aproveitar o interese e a capacidade de atracción que xera a figura de Rosalía e, con esa xustificación, ofrecerlle ao visitante unha completa oferta turística. Porque Brión é máis que as campás de Bastavales, tamén é historia como as Torres de Altamira, lendas como o Castro Lupario, e ata lugar de descanso para os fans do turismo termal”.

O alcalde de Padrón, Antonio Fernández Angueira, explicou que para a posta en valor desta ruta os concellos involucrados “non tivemos que inventar nada, senón que nos limitamos a pór en valor unha parte fundamental da nosa historia recente e aqueles lugares que formaron parte do escenario vital de Rosalía de Castro”. Ademais, amosouse convencido do interese que espertará esta nova ruta porque “Rosalía, como muller poliédrica que era, continúa a ser un referente na sociedade actual pola súa herdanza literaria, intelectual, humanística, feminista, identitaria e galeguista”.

Contido relacionado

El Correo Gallego: "Padrón, Ames y Brión convierten los escenarios vitales de Rosalía en una ruta"
La Voz de Galicia: "Padrón, Ames y Brión convierten en ruta turística los escenarios de la vida de Rosalía de Castro"