Un ano máis o Concello de Ames, a través da Concellaría de Comunicación, pon en marcha o proxecto Radio Cidadá, no que a emisora municipal abre as súas portas aos veciños e veciñas de Ames para conducir os seus propios programas. Este ano mantéñense dez das propostas que xa se integraran na grella de edicións anteriores: Vivirmos nun mundo finito, Apuesta por el Rock and Roll, Exército Mekemeke, Vaide retro, De museo, Miradas, O protocolo é para todos, Contos económicos, Tangos de la esquina sur e Las carabelas del siglo XXI. Todas elas son espazos consolidados xa coñecidos pola audiencia de Ames Radio

Ademais, nesta nova convocatoria hai catro novidades: Milladoiro ao día, que fai un percorrido pola historia de Ames; La hora de la columna, no que se fala de moda, sociedade e actualidade do mundo do corazón; El cuerpo que habitamos, un espazo sobre benestar conducido pola comunicadora social Martha Franco, que busca afondar na relación corpo-mente e emocións; e La Juli y la Bélen, no que se abordan temas cotiás desde unha perspectiva cómica e divertida.

Programas semanais, quincenais e mensuais
Este ano son sete os programas que se emitirán en Ames Radio cada semana: Vivirmos nun mundo infinito, nos luns ás 19:30 horas; Exército Mekemeke, os mércores ás 19:00 horas; Contos económicos, os xoves ás 19:30 horas; Tangos de la esquina sur, os venres ás 21:30 horas e Las carabelas del siglo XXI, os sábados ás 10:00 horas. Os programas de nova incorporación La hora de la columna e La Juli y la Bélen emitiranse os martes ás 19:30 horas e os venres ás 19:30 horas, respectivamente.

Outros programas poden escoitarse cada dúas semanas, e alternan a súa emisión en días e horas compartidos: Vaide retro e De museo, os mércores ás 19:30 horas, e O protocolo é para todos e El cuerpo que habitamos, os xoves ás 19:00 horas.

As restantes propostas teñen unha emisión mensual: Apuesta por el Rock and Roll, os martes ás 18:30 horas; Milladoiro ao día, os martes ás 19:00 horas; e Miradas, os mércores ás 21:30 horas.