Os premios do certame Galetiktokers suman uns 600 euros, repartidos entre dúas categorías determinadas pola idade. A primeira categoría inclúe á rapazada dos 13 aos 16 anos (ambas as idades incluídas) e a segunda engloba a mocidade a partir dos 17 anos. Ambas modalidades optan a dous premios de 150 euros, decididos polo xurado ou ben polo público, que votou polos seus vídeos favoritos a través da conta de Instagram da OMIX de Ames.

En total, unhas 21 propostas de 17 candidatas foron enviadas e aceptadas pola organización. A temática das pezas é variada, mais a lingua e a cultura galega destacan como foco principal dos tiktoks das participantes. Os vídeos inclúen referencias á música, ao deporte, á sociolingüística ou mesmo a estereotipos do galego, mais tamén hai tiktoks de carácter humorístico ou de bailes. Os vídeos creados para esta segunda edición do Galetiktokers tiñan que estar en lingua galega, e debían ser de creación propia a través da aplicación TikTok, cunha duración de entre 15 e 60 segundos.

A concelleira de Mocidade e Normalización Lingüística, Escarlata Pampín, quixo felicitar a todas as participantes e destacar que nesta edición foron máis as rapazas e as mulleres que se animaron a enviar as súas propostas: máis concretamente, un 86% dos vídeos candidatos leva firma feminina. “Agradezo moito a participación de todas as persoas, que coas súas creacións puxeron de manifesto o talento que hai no país, contribuíndo ademais a espallar a nosa lingua pola rede. Quero resaltar en especial a maioritaria participación de mulleres nesta edición".

A gala, que se celebrará na Casa da Cultura de Bertamiráns este xoves 16 de decembro, ás 20:00 horas, estará conducida polas influencers e presentadoras de televisión Fátima Pego e Lucía Rodríguez, que xa acudiran á presentación desta nova edición de Galetiktokers o pasado mes de outubro. Os influencers Gabi G e Leti da Taberna, que forman o xurado xunto a Lucía Rodríguez, tamén intervirán na gala cuns monólogos. Ademais, no evento haberá música da man de DJ Son1c e da propia copresentadora da gala, Fátima Pego.

En representación do Goberno municipal e do seu equipo técnico asistirán Escarlata Pampín, concelleira de Mocidade e Normalización Lingüística; Pili Villaverde, técnica da OMIX de Ames, e Rosa Moreiras, técnica do Servizo de Normalización Lingüística do concello.

Os convites, de balde, xa se poden retirar na billeteira electrónica do Concello de Ames.

Novas relacionadas

El Correo Gallego: "Los galetiktokers con más ‘flow’ serán galardonados"