O Teatro Colón da Coruña acolleu o pasado venres 14 de marzo a III edición dos Premios do Deporte na Deputación da Coruña, unha cita que reuniu aos mellores deportistas e clubs da provincia para recoñecer os seus logros neste último ano. En total, entregáronse 15 galardóns e, neles, houbo unha amesá premiada.

A karateka Olivia Parga recibiu o Premio a mellor deportista promesa feminina en categoría base, un galardón que pon en valor o palmarés acadado pola deportista do Milladoiro nos só dous anos que leva competindo. Deste xeito, a moza amesá compartiu escenario con algúns dos mellores deportistas galegos na actualidade, como Ana Peleteiro ou César Carballeira.

Así mesmo, a karateka amesá visitou esta semana os estudios de Ames Radio para compartir a súa experiencia nesta gala de premios, na que admitiu que “ao ser a deportista galardoada máis nova estiveron a facerme varias entrevistas nada máis chegar” e, ademais, “estaba bastante feliz e emocionada aínda que tamén un pouco nerviosa cando subín ao escenario”.

Campionato Galego Infantil e Copa Cadete
Por outra banda, o pasado 8 de marzo, celebrouse en Santiago de Compostela o Campionato Galego Infantil e Copa Cadete de Karate. Nesta cita, Olivia Parga conseguiu a medalla de ouro na categoría cadete de <47 kg na modalidade de kumite.

Tras uns encontros moi igualados fronte a rivais do Akai Ryu de Negreira e do Karate River Stone do Barco de Valdeorras, a amesá conseguiu finalmente a medalla de ouro. Deste xeito, Olivia Parga xa prepara a súa vindeira cita deportiva, a Youth League de Karate que se disputará na cidade de Guadalajara a comezos do mes de abril e que reunirá ás mellores promesas do karate a nivel internacional.