Na actualidade, o corpo da Policía Local de Ames, integrado por un total de 21 efectivos en activo, conta cun parque automobilístico que está composto por tres vehículos e dúas motos para desenvolver o seu traballo. Estes vehículos rexistran un uso intensivo (todos os días á semana durante practicamente 24 horas), polo que a Policía Local manifestou a necesidade de dispor duns vehículos novos.

Co obxectivo de renovar o parque automobilístico da Policía Local, a Xunta de Goberno Local do Concello de Ames aprobou en agosto de 2022 o expediente de contratación do subministro de dous vehículos híbridos baixo a modalidade de renting adscritos á Policía Local do Concello de Ames. Unha vez finalizado o proceso de contratación, a Xunta de Goberno Local aprobou o 2 de febreiro de 2023 a adxudicación deste servizo, para que sexa a empresa Autos Iglesias SL a que se encargue de subministrar dous novos vehículos híbridos.

O contrato asinouse o pasado 1 e marzo e terá unha duración de 48 mensualidades, sen posibilidade de prórroga dende a sinatura da acta de recepción dos vehículos. A empresa deberá de subministrar os vehículos nun prazo máximo de 95 días naturais contados a partir do día seguinte da notificación da adxudicación do contrato.

A oferta económica de subministro ascende a 167.851,20 euros (IVE incluído). O pago de dito importe está dividido en varias anualidades. De maio a decembro de 2023 aboarase a contía de 27.975,20 euros. Nos exercicios 2024, 2025 e 2026 aboarase cada ano a contía de 41.962,80 euros. Por último, de xaneiro ata abril de 2027 aboarase a contía de 13.987,60 euros.

Servizo de mantemento da rede semafórica
Por outra banda, na Xunta de Goberno Local do pasado 2 de febreiro tamén se aprobou a adxudicación do contrato do servizo de mantemento da rede semafórica do concello de Ames. Dito servizo adxudicouse á empresa Kapsch Trafficcom consultoría técnica SAU por un importe de 87.785,02 euros (IVE incluído) por un período inicial de dous anos, podendo prorrogarse anualmente ata un máximo de catro anos.

O contrato deu comenzo o 1 de marzo de 2023. A regulación do tráfico é unha competencia adscrita á Policía Local. Neste caso a regulación do tráfico faise a través da rede semafórica e para que funcione correctamente é necesario subcontratar o servizo de mantemento. A empresa adxudicataria encargarase do mantemento dos aspectos electrónico de funcionamento dos semáforos para que funcionen correctamente.

Novas relacionadas:

El Correo Gallego: "O uso intensivo dos cinco vehículos da Policía amesá obriga a encargar dous novos coches"

AMS GO!: "Coches con menos fumes para a Policía Local"