Carlos Negro achégase unha vez máis aos lectores e lectoras mozas e desta volta faino a través da narrativa. Nove contos “cargados de lirismo, poesía e unha alta dose de culturalismo no que o lector é interpelado desde a intelixencia, desde a consciencia e desde a consideración de que o futuro está nas súas mans”, en palabras de María Navarro, do Faro de Vigo, compoñen a nova obra do autor lalinense afincado en Ames.

Na presentación do libro fálase do medo: “É hora de experimentar o pracer nada culpable do medo”, e déixanse entrever algúns dos temas e dos escenarios polos que transitan os relatos: “Un xuramento de sangue. O fulgor dunha moeda romana. O voo dunha mosca sobre o mantel da cociña. O rastro dunha nova especie de lesmas. A rutina dun autobús escolar. A transparencia dunha piscina. A soidade dun tobogán. O misterio dunha carta sen remitente. O canto do vento nunha mansión á beira do mar...”

Ademais de participar en varias obras colectivas, Carlos Negro ten publicados unha decena de poemarios, moitos deles dirixidos á mocidade e algún ensaio. Posúe ademais premios tan importantes como o Johán Carballeira, o Fiz Vergara Vilariño o da AELG á mellor obra de literatura infanto-xuvenil e o Xules Vernes de literatura xuvenil. É profesor de literatura e lingua galegas e na actualidade exerce a docencia no IES e Bertamiráns.