A Casa da Cultura do Milladoiro contará dende o vindeiro luns, 27 de novembro, coa exposición fotográfica “Proxectos de axuda á infancia”, onde se recollen imaxes dos proxectos de cooperación de axuda á infancia que desenvolve a Fundación nas áreas de Saúde Materno-Infantil, Protección e Dereitos da Infancia.

A mostra fotográfica recolle imaxes do programa de saúde «Viaxe cara á Vida» desenvolto por Tierra de Hombres en Galicia desde o ano 2003 e que fai posible que nenos e nenas africanos con graves enfermidades sexan tratados en hospitais ata a súa recuperación e regreso coas súas familias. Para a realización de dita mostra contouse coa colaboración dos fotógrafos Marcos Martínez e Marcos Cenamor.

Cea solidaria
Por outra banda, a Fundación Tierra de Hombres organiza este venres, 24 de novembro, unha cea solidaria, á que pode asistir calquera persoa que queira aportar o seu gran de area, terá un prezo de 30 euros para adultos e de 15 euros para nenos, que serán aboados no número de conta ES88 2080 0036 6730 4001 9673.

Os fondos que se consigan servirán para apoiar os proxectos que desenvolve a fundación.  As reservas para participar na cea solidaria pódense formalizar enviando un correo a deleg.galicia@tierradehombres.org ou chamando ao teléfono 600 322 944.

Fundación Tierra de Hombres
A Fundación Tierra de Hombres adícase fundamentalmente á Cooperación ao Desenvolvemento. No ámbito da saúde, loitan por ofrecer un acceso aos coidados básicos a todos os nenos e nenas, sen ter en conta o lugar onde se atopen.

Os seu traballo neste ámbito inclúe un importante seguimento vinculado á desnutrición, así como un dos proxectos históricos de Tierra de Hombres, Atencións Médicas Especializadas (AME) con traslados para coidados especializados co programa “Viaxe cara á Vida”. Este, lévase a cabo cando a enfermidade dos pequenos precisa dunha tecnoloxía e infraestruturas das que carecen nos seus países de orixe.