[23-10-2015] A empresa amiense Escola Inventa, en colaboración co Concello de Ames, organiza este sábado 24 de outubro, en horario de 16:20 a 20:00 horas, a sexta edición do evento Lab Class-Inventa a túa comunicación. Neste evento, que se celebrará na Casa da Cultura do Milladoiro, directivos de diferentes sectores trasladarán a súa experiencia profesional e aprendizaxe aos participantes. O evento ten lugar logo da celebración dunha xuntanza entre representantes do Concello e da propia empresa, co fin de abordar diferentes temas relacionados coa organización do acto. Na reunión, celebrada na sede de Escola Inventa, na rúa Palmeiras do polígono empresarial Novo Milladoiro, estiveron presentes o alcalde de Ames, José Miñones, a concelleira de Promoción Económica, Isabel González, dous técnicos municipais das áreas de Promoción Económica e Turismo, o director de Escola Inventa, Eloy Gesto, e a asesora comercial da empresa, Sandra Castro.
Logo de acoller o pasado mes de xullo a quinta edición do evento Lab Class-Inventa a túa comunicación, a Casa da Cultura do Milladoiro volve ser o escenario elixido para a realización da sexta edición do acto que organiza a empresa Escola Inventa. Trátase dunha oportunidade de coñecer historias reais que inspiren aos asistentes para o día a día na empresa, ademais de descubrir novos relatores. Este evento, que se desenvolverá entre as 16:20 e as 20:00 horas, estará composto de mesas redondas e momentos inspiradores. Tamén se poderán establecer contactos con outros profesionais no descanso, facendo networking. Igualmente, haberá mesas abertas ao público, nas cales se establecerán dúas quendas de preguntas de 20 minutos, onde os relatores responderán as preguntas dos asistentes.
Para os asistentes, o evento Lab Class-Inventa a túa comunicación suporá unha oportunidade para comprender a importancia da comunicación na empresa, sociedade ou institucións. Unha demostración de que as persoas poden mellorar a súa comunicación e amosar as súas experiencias, aprendizaxes e novas visións. Para os ponentes é o final dun seminario de Alto Rendemento onde viven unha experiencia dun evento real con máis de 100 persoas asistentes, un punto de inflexión na súa comunicación e o inicio dun camiño para atopar a confianza, naturalidade, autenticidade e comprensión da comunicación.
As temáticas do evento
O evento Lab Class-Inventa a túa comunicación estará impartido por directivos de diferentes sectores, que trasladarán a súa experiencia profesional e aprendizaxe aos participantes. “Gas a fondo", de César Felípez, "Sweet home", a cargo de Rosana Núñez, "La vida es como es", de Óscar Varela, "Especies digitales", por Cristina Sande, "Plan A, trading y bolsa", de Fran Fialli, "Esta película la dirijo yo", de Borja Alemparte e “Cadena de favores”, a cargo de Manuel L. Pan, serán as oito temáticas que se abordarán o próximo sábado na Casa da Cultura do Milladoiro.
Trátase dun evento aberto ata completar o aforo de 100 persoas. Para obter máis información sobre este evento (programa, horarios, biografías dos poñentes, inscricións, etc.) podes consultar a páxina web de www.escuelainventa.com
Contido relacionado
La Voz de Galicia: "Escola Inventa organiza su sexto encuentro sobre comunicación"