A síndrome de Angelman (SA) é un trastorno neuroxénetico pouco común, que afecta aproximadamente a unha de cada 15.000 persoas, un medio millón delas en todo o mundo. Baixo a petición de FAST España (Fundación pola Terapia para a Síndrome de Angelman), o Concello de Ames súmase neste 15 de febreiro ás conmemoracións desta xornada, que buscan visibilizar un trastorno cuxo tratamento pode abrir as portas para coñecer mellor outras enfermidades e trastornos, como a ELA, o autismo, o Alzheimer ou a epilepsia.

As persoas con SA requiren atención continua e non poden vivir de maneira independente. A miúdo teñen problemas de equilibrio, atraso motor, discapacidade intelectual, epilepsia ou trastornos do soño. As características típicas da síndrome de Angelman son dificilmente identificables nos primeiros meses de vida e habitualmente se diagnostica erroneamente como autismo ou parálise cerebral. As persoas con SA teñen trazos de conduta diferenciados, como un comportamento feliz con excitabilidade, sorrisos e risas frecuentes.

Malia ser un trastorno pouco coñecido, o certo é que a alteración xenética que causa a síndrome de Angelman foi vinculado a outras enfermidades e trastornos xenéticos relacionados coa aprendizaxe e a memoria. Asemade, a investigación para atopar un tratamento para a SA está avanzada, o que pode servir como punto de partida para entender outras enfermidades e desenvolver novas terapias. Algúns dos trastornos que gardan relación coa SA son o autismo, a ELA, o Alzheimer, a epilepsia ou as síndromes X fráxil e de Rett.

Premendo nesta ligazón, pódese coñecer máis información sobre a síndrome de Angelman, no portal de FAST España.

Novas relacionadas

Enfoques.gal: "El Concello de Ames se tiñe de azul por el Día del Síndrome de Angelman"