[10-12-2011] O Concello de Ames a través da Concellaría de Servizos Sociais, Familia, Dependencia e Maiores, pon en marcha unha nova edición do programa de baile para maiores. As sesións desenvolveranse entre os meses de decembro e abril e as actuacións correrán a cargo do dúo musical Eva e Camilo, que contrata directamente o Concello. A música en directo e a posibilidade de pasar unha tarde entretida son os principais reclamos desta actividade na que ademais os participantes coñecen a outras persoas nun ambiente festivo e distendido. A Concellería que dirixe Mª Dolores Fernández deseñou un programa para que os domingos a Casa da Cultura de Bertamiráns e o Centro Social de Xubilados de Milladoiro acollan estas xornadas de baile.
As sesións de baile comezan este domingo día 11 de decembro no Local de Xubilados do Milladoiro, mentres que na Casa da Cultura de Bertamiráns iniciaranse o próximo domingo día 18 de decembro. As datas nas que haberá baile serán o 11 de decembro, 15 de xaneiro, 12 de febreiro, 11 de marzo e 15 de abril en Milladoiro. Na localidade de Bertamiráns as datas serán o 18 de decembro, o 22 de xaneiro, o 19 de febreiro o 18 de marzo e o 22 de abril. O horario desta actividade será o mesmo todos os domingos, de 19.00 a 22.00 horas.
Esta actividade organízase co obxectivo de que sexa un espazo de encontro e de lecer no que os veciños e veciñas maiores, e os non tan maiores, ademais de bailar, se relacionen cos amigos e coñecidos e establezan amizades novas.