[23-09-2016] O Concello de Ames celebrou hoxe, venres 23 de setembro, as comisións informativas previas ao pleno ordinario deste mes. Nestas comisións informativas abordouse a primeira prórroga do contrato de xestión da limpeza viaria e do punto limpo. Outro dos asuntos tratados foi a aprobación definitiva do regulamento do Consello Escolar Municipal de Ames e maila designación dos dez representantes da corporación municipal en dito consello escolar. Ademais, abordouse a modificación do dominio da sede electrónica do Concello de Ames que pasaría a ser sede.concellodeames.gal, así como as propostas de que o Concello de Ames se postule como sede da Axencia Europea do Medicamento e sobre o incumprimento do tratado liberal entre España e Venezuela en materia de seguridade social asinado o 12 de maio de 1988.
Despois de que no pasado pleno ordinario de marzo se modificara o sistema de prórroga do contrato asinado con Urbaser SA, para a xestión da limpeza viaria e do punto limpo do Concello de Ames, agora no pleno ordinario de setembro toca abordar a aprobación da primeira prórroga deste contrato. Cómpre lembrar que en xullo de 2006 aprobouse a adxudicación á empresa Urbaser SA do concurso convocado para a xestión do servizo de limpeza viaria e do punto limpo. Posteriormente, a devandita empresa comezou a prestar este servizo en xaneiro de 2007.
Tendo en conta que en xaneiro de 2017 remata dito contrato, dende a concellaría de Urbanismo, Obras Públicas e Servizos Básicos, presentaron a proposta de modificar o réxime de prórroga co obxectivo de que esta se realice de xeito anual, por mutuo acordo de ambas partes, ata un máximo de 10 anos, en lugar dos 10 anos seguidos previstos anteriormente no contrato. Todos os grupos municipais apoiaron esta iniciativa e votaron a favor polo que este asunto saíu adiante por unanimidade.
Deste xeito, nas comisión informativas tratouse a aprobación da primeira prórroga deste contrato polo prazo dun ano que iría dende o 15 de xaneiro de 2017 ata o 14 de xaneiro de 2018. Neste senso, tamén hai que destacar que o pasado 1 de agosto comezou a funcionar o servizo de limpeza, que ofrece a empresa Urbaser, nas novas zonas que se recollen no contrato de ampliación aprobado en pleno o pasado 26 de maio de 2016. A ampliación deste servizo foi unha vella demanda da veciñanza amesá e afecta a diversas rúas de Bertamiráns, O Milladoiro, e ás urbanizacións do Agro do Muíño e Millalar.
Consello Escolar Municipal de Ames
Outro dos asuntos que se abordaron en ditas comisións foi a aprobación definitiva do regulamento do Consello Escolar Municipal de Ames e maila designación dos dez representantes da corporación municipal en dito consello escolar. No pasado pleno ordinario de marzo foi aprobado, de xeito inicial, o regulamento do Consello Escolar Municipal de Ames. Trátase dun órgano, que en palabras do concelleiro de Educación e Cultura, servirá de altofalante da comunidade educativa para todo o referido ao ámbito da educación. É unha ferramenta formal para canalizar as demandas en materia educativa.
Dito regulamento substituirá ao aprobado no ano 2004, que nunca se chegou a poñer en marcha. O novo regulamento inclúe unha cláusula importante que é a participación de todos os membros da corporación e da comunidade educativa que desexen estar presentes nos plenos deste consello escolar. Este órgano será o principal punto de encontro da comunidade educativa para a toma de decisións no ámbito municipal. No pleno ordinario de setembro, ademais de aprobar de xeito definitivo este regulamento se procede, haberá que aprobar a designación dos dez membros que representarán á corporación municipal en dito consello. Estes representantes foron elixidos entre os /as directores/as dos centros educativos, representantes dos sindicatos, asociacións de empresarios, movementos de renovación pedagóxica, titulares de centros privados e concertados, especialistas en temas educativos e asociación de veciños.
Deste xeito, a proposta do goberno municipal é que estes dez representantes sexan o director do CEIP Agro do Muíño, a directora da EEI do Milladoiro, a directora do CEIP da Maía, o director do CEIP de Barouta, o director do CEP de Ventín, a directora do IES de Bertamiráns, o director do IES do Milladoiro, e mailo titular do colexio concertado Alca. A estes oito representantes sumarase a directora da escola infantil municipal A Madalena e a directora da Galiña Azul de Bertamiráns os anos par, mentres que os anos impares uniranse a directora da escola infantil municipal O Bosque e a directora da Galiña Azul do Milladoiro.
Sede electrónica do Concello de Ames
Por outra banda, abordouse o cambio de dominio da sede electrónica do Concello de Ames. No pleno ordinario de febreiro de 2013 adoptouse o acordo de crear a sede electrónica do Concello de Ames (sede.concellodeames.org) como unha subsede da sede electrónica da Deputación Provincial da Coruña (sede.dicoruna.es). Agora, vaise a propor en Pleno o cambio de dominio do enderezo electrónico da sede municipal que pasaría a denominarse sede.concellodeames.gal. A través desta modificación o goberno municipal pretende avanzar no camiño da normalización administrativa do uso do galego na administración local.
Ademais, tratouse unha proposta presentada por Javier López, en calidade de voceiro do grupo municipal de non adscritos, para que o Concello de Ames se postule como sede da Axencia Europea do Medicamento. Nesta proposta ínstase ao goberno de España e á Unión europea para que teñan en conta ao Concello de Ames como municipio de acollida da sede da AEM, unha vez esta deixe de ubicarse na cidade de Londres, con motivo da saída de Reino Unido como estado membro da Unión Europea. Ademais, tamén se insta a estes dous organismos a que teñan en conta Ames como concello de acollida doutros organismos internacionais, que tendo na actualidade sede en Londres, estean na busca dunha nova ubicación.
Por último, abordouse unha proposta presentada polo grupo municipal de Pacto x Ames sobre o incumprimento do tratado liberal entre España e Venezuela en materia de seguridade social asinado o 12 de maio de 1988. Nesta proposta ínstase ao goberno de España para que lle solicite ao goberno da República Bolivariana de Venezuela o cumprimento do devandito convenio. Asemade, ínstase ao Ministerio de Emprego e Seguridade Social para que ofrezan unha solución temporal ás persoas emigrantes retornadas de Venezuela, que non están cobrando a súa pensión ata que o goberno de Venezuela proceda ao pagamento pendente. Tamén se insta á Xunta de Galicia para que se interese pola situación dos galegos e galegas que forman parte deste colectivo, e haberá, no caso de que sexa aprobada, dar traslado ao Consulado Xeral da República Bolivariana de Venezuela en Vigo da aprobación desta moción.
Contido relacionado
La Voz de Galicia: "Ames estudia la prórroga del contrato de limpieza viaria"