O Concello de Ames ten preparada unha ampla programación cultural para o mes de decembro. Dentro desta programación atópase a representación do espectáculo de danza moderna In-Nova, Danza Moderna e Hip-Hop, a cargo da compañía As Dríadas. Esta compañía innova un espectáculo de fusións no que o hip-hop, new estyle e a danza moderna son os protagonistas. Complementado con outros estilos, o espectáculo pretende expresar a liberdade e a espontaneidade da mocidade. Representarase na Casa da Cultura do Milladoiro o luns 26 de decembro, ás 18:00 horas, e o xoves 29 de decembro na Casa da Cultura de Bertamiráns á mesma hora. A obra está pensada para todos os públicos.

Antes do espectáculo, a mesma compañía impartirá un obradoiro de danza moderna dirixido a todos os públicos. Aínda que a actividade está aberta a calquera idade, dende a compañía recoméndase que o alumnado teña unha idade comprendida entre os seis e os catorce anos. Os profesores encargados de impartir o obradoiro serán Alba Fernández e Estefanía Gómez. Con esta iniciativa preténdese achegar o mundo da danza moderna a toda a cidadanía amiense e crear unha pequena coreografía.

O obradoiro consistirá fundamentalmente na preparación dunha coreografía, creada nun 90% por parte das profesoras, e nun 10% polos/as alumnos/as, mediante diferentes premisas establecidas, xogando coa enerxía, o nivel dos movementos e a técnica de contacto entre o alumnado. Todo iso para fomentar a creatividade. Ademais, se dá tempo, elaborarase unha batalla de baile, na que o alumnado ensinará todo o que aprendeu durante o curso. O obradoiro rematará con exercicios de estiramento para evitar o agarrotamento dos músculos.