[05-01-2016] O prazo de solicitude para participar no programa de termalismo social, organizado polo Ministerio de Sanidade a través do IMSERSO, continúa aberto. Aqueles que desexen participar no mesmo entre os meses de febreiro e agosto de 2016 deberán entregar a solicitude nas oficinas de Servizos Sociais de Bertamiráns ou do Milladoiro antes do 8 de xaneiro. Outra opción é facer a solicitude na páxina web do IMSERSO ou por correo electrónico nas oficinas do programa de termalismo en Madrid antes do 11 de xaneiro. Premendo nos enlaces que están a túa dereita, baixo o apartado de descargas, poderás obter o formulario de inscrición, o folleto explicativo e a listaxe completa de balnearios ofertados.
O programa de termalismo social ofrece a posibilidade de gozar dunha estancia, en réxime de pensión completa, de 12 ou de 10 días nun dos balnearios adscritos ao programa situados nas diferentes comunidades autónomas. Aquelas persoas que precisen un dos tratamentos que ofertan estes balnearios, empregando augas mineiro-medicinais cuxas propiedades axudan a tratar doenzas ou afeccións respiratorias, dermatolóxicas, nerviosas, dixestivas ou renais, poderán facelo a prezos reducidos. Todos os tratamentos serán seguidos atentamente por persoal médico, que recoñecerá aos participantes do programa tanto ao principio como ao remate do mesmo.
Abriranse dous prazos para a entrega e envío de solicitudes. O primeiro prazo é para aqueles e aquelas que queiran participar entre os meses de febreiro e agosto, ambos incluídos. Os amesáns e amesás que queiran realizar a solicitude poderán entregar os papeis nas dependencias dos Servizos Sociais do Concello, tanto nas situadas na Casa da Cultura de Bertamiráns como nas Oficinas xerais do Milladoiro antes do día 8 de xaneiro. Outra opción é envialos por correo ás dependencias de Termalismo Social en Madrid ou realizar a inscrición telemática na páxina web do IMSERSO.
As solicitudes para da segunda quenda do programa, que se desenvolverá entre os meses de setembro e decembro, ambos incluídos, deberán ser entregadas antes do 9 de maio nas mesmas oficinas do Concello ou do 11 de maio tamén por correo ou telematicamente. A petición de inclusión nas listas de agarda poderase realizar ata o 28 de outubro nas dependencias do Concello e ata o 31 de outubro na web do IMSERSO ou por correo nas oficinas de Termalismo Social en Madrid.
Requisitos para participar neste programa
As persoas que desexen participar deberán cumprir algún dos seguintes requisitos: ser pensionista da Seguridade Social polo concepto de xubilación ou incapacidade permanente, ser pensionista de viuvez pola Seguridade Social e con 55 ou máis anos de idade, ser pensionista ou perceptor de prestacións ou subsidios de desemprego da Seguridade Social con sesenta ou máis anos de idade ou ser asegurado ou beneficiario da Seguridade Social con setenta e cinco ou máis anos de idade. Poden participar igualmente as persoas de nacionalidade española residentes no estranxeiro que cumpran algún dos citados requisitos. Os solicitantes poderán acudir acompañados do seu conxugue ou parella aínda que non sexan beneficiarios do sistema de Seguridade Social.
A adxudicación das prazas realizase de acordo á puntuación obtida polos solicitantes, en base ao seu grao de necesidade dos tratamentos, á súa idade e situación económica, á pertenza a unha familia numerosa ou ter participado nalgún dos programas de termalismo dalgúns dos dous anos anteriores. A resolución será notificada por escrito.
O IMSERSO publicou na súa páxina web un listado dos balnearios ofertados no programa este ano. En Galicia a oferta ascende a 20 balnearios repartidos nas catro provincias, un dos cales se atopa a tan só cinco minutos de Bertamiráns, no concello de Brión.