O Ames Cultural continúa coa representación da primeira das obras dirixidas para público infantil e familiar, “Kyoki” de Elefante Elegante, este vindeiro venres 31 de xaneiro, ás 18.00 horas, no auditorio da Casa da Cultura do Milladoiro. Esta programación forma parte do convenio de colaboración entre a Axencia Galego das Industrias Culturais (AGADIC) e o Concello de Ames. A peza, a través só da linguaxe xestual, evoca a múltiples situacións e temáticas como a vellez, o esquecemento ou a soidade.

Esta obra invita á reflexión sobre as experiencias e situacións que viven as persoas que precisan ser coidadas tanto como as propias coidadoras. A través só de xestos, manipulación e interacción coa decoración e obxectos do escenario, créase unha viaxe que traslada ao público desde o realisto ata a hipérbole da propia vida cotiá.

As persoas interesadas en asistir a esta representación teatral xa poden adquirir na Billeteira electrónica do Concello de Ames os seus convites. Ata o momento, a ocupación para esta representación é aproximadamente do 30% das butacas dispoñibles.

Elefante Elegante
A compañía teatral Elefante Elegante naceu no ano 2000 da man de María Torres e Gonçalo Guerreiro. Nos seus primeiros anos de traballo, o grupo estivo afincado en Bélxica e, ademais, comezou como un proxecto experimental no que participaban diferentes actrices e actores de diferentes puntos de Europa, ata instalarse definitivamente no 2007 en Galicia.

Con varios recoñecementos e premios ás súas costas, Elefante Elegante é toda unha compañía referente dentro do teatro xestual, baseando as súas obras na linguaxe corporal para construír as tramas teatrais, e no que se adoitan tratar temas de forte carácter social e existencial. Ademais, na actualidade, a compañía actúa en diferentes festivais e escenarios de todo o mundo, como Portugal, Alemaña ou Colombia.