Quen teña ganas de vivir a maxia da radio en directo poderá facelo este luns, 22 de xullo, no auditorio da Casa da Cultura do Milladoiro. Alfonso Pardo chega a Ames co seu programa Convivir Deportivo, da Radio Galega, no que conversará con Borja Golán, un dos deportistas de máis éxito do concello a nivel nacional e internacional. Dende o ano 2002, no que gañou o seu primeiro campionato de España, o xogador amesán gañou todos os títulos disputados, excepto o do ano 2010 no que tivo unha grave lesión de xeonllo e non puido participar. Ademais, proclamouse campión de Europa nos anos 2016 e 2018.

Na última Gala do Deporte de Ames, celebrada a finais do mes de xaneiro, Borja Golán foi elixido como deportista máis destacado de 2018 en categoría masculina. Ademais, e como recoñecemento á súa brillante carreira deportiva, no anexo do pavillón polideportivo de Bertamiráns construíuse a nova pista de squash "Borja Golán Santín".

O programa Convivir Deportivo comezará ás 20:00 horas, con entrada libre e de balde para todos os veciños e veciñas que queiran coñecer e saber un pouco máis da radio dende dentro.

Ligazóns:

Compostela 24h: "Convivir Deportivo, da Radio Galega, chega este luns á Casa da Cultura do Milladoiro"