Este xoves, 10 de agosto, arrinca no Milladoiro a primeira actividade de marcha nórdica “Camiñando no solpor”, incluída dentro da programación do “Activa Ames Verán”, posto en marcha polo departamento de Promoción da Saúde. A andaina volverá a repetirse con saída dende o Milladoiro o 24 de agosto, e dende Bertamiráns os días 17 e 31. A proposta é gratuíta, e non é precisa inscrición previa. Así, complétase o ciclo de iniciativas do “Ames Activa Verán”, que tamén comprende clases de ioga terapéutico, de taichi tradicional e de chi kung.
Un ano máis, o departamento de Promoción da Saúde do Concello de Ames está a desenvolver o programa “Activa Ames Verán”, unha adaptación das actividades do Ames Saudable que ten lugar durante a época estival, con propostas para o coidado da saúde física e emocional. As actividades realízanse no Milladoiro (no entorno da piscina municipal) e en Bertamiráns (nos xardíns do Pazo da Peregrina).
Hoxe, xoves 10, dan comezo as andainas de marcha nórdica, unha das propostas do programa para este verán. O punto de encontro é a Casa da Cultura do Milladoiro, e a actividade dará comezo ás 20:30 horas. Os camiñantes recorrerán oito quilómetros e medio, e pasarán pola carballeira de Paramuíño, a aldea de Ventín, o lugar de Coira e por un tramo do Camiño de Santiago.
Participar na andaina é gratuíto, e non é necesaria inscrición previa. As persoas que precisen bastón para realizar o percorrido poden solicitar o seu préstamo de xeito gratuíto a través do enderezo electrónico promociondasaude@concellodeames.gal.
Ao longo do mes realizaranse outras tres rutas de marcha nórdica, con saída dende o Milladoiro o 24 de agosto e dende Bertamiráns os días 17 e 31. Esta actividade reporta numerosos beneficios: combate as malas posturas corporais, axuda a perder peso, fortalece o corazón e mellora a circulación sanguínea, contribúe a mellorar a práctica doutros deportes, reduce o estrés...
Clases de ioga terapéutico, taichi tradicional e chi kung
A programación do “Activa Ames Verán” completouse con clases doutras disciplinas, que tiveron lugar durante o mes de xullo. Así, os días 3, 5, 10 e 12 houbo ioga terapéutico no Milladoiro; mentres que en Bertamiráns ofreceuse a actividade os días 4, 6, 11 e 13. Por outro lado, celebráronse sesións de taichi tradicional e de chi kung, os días 17, 24 e 31 de xullo no Milladoiro e 18, 20 e 27 en Bertamiráns. Todas elas lograron unha gran acollida e contaron con vinte participantes de media por xornada.
Novas relacionadas:
AMS GO!: "Marcha nórdica no Milladoiro"
