A Rede municipal de comedores escolares de Ames é un modelo de xestión para moitos concellos galegos e do Estado. Nesta ocasión quen se interesou polo sistema de comedores escolares amesán foi a Deputación de Lugo. Deste xeito, a deputada provincial, Mónica Freire Rancaño, responsable da Área de Medio Rural, Mar e Mocidade da Vicepresidencia da Deputación de Lugo, visitou o concello de Ames para manter unha xuntanza co concelleiro de Educación, David Santomil, e coa técnica do departamento de Educación, Rosa García.

Durante a visita que fixo a Ames estivo na Casa do Concello, na cociña do CEIP Agro do Muíño e no comedor do CEIP A Maía. Ademais, sumouse á visita nos comedores escolares, Román Sánchez Besteiro, xerente da cooperativa luguesa, A Carqueixa, e coordinador da plataforma de comercio electrónico sondelugo.com, de distribución de produtos agroalimentarios da provincia de Lugo.

O obxectivo da visita foi coñecer o funcionamento dos comedores escolares de Ames, a loxística de transporte e a subministración de produtos locais de alimentación para estudar a súa posible aplicación na Rede de Centros Públicos de Atención a Maiores da Deputación Provincial de Lugo. En particular, a posibilidade de dotarse de provedores de proximidade.

O concelleiro de Educación, David Santomil, salientou que “este tipo de visitas institucionais resultan de interese para dar a coñecer o noso traballo, establecer liñas de colaboración e intercambiar  experiencias e coñecemento”. Ademais, David Santomil tamén explicou que non é a primeira visita que reciben interesándose sobre a xestión dos comedores escolares. “En novembro de 2019 tamén recibimos a visita do concello almeriense de Macael interesándose polos programas de conciliación da vida laboral e familiar de Ames”.

Os servizos complementarios de educación e conciliación, no que está incluída a Rede Municipal de Comedores Escolares, teñen como principal obxectivo conciliar a vida familiar e laboral de todos os veciños e veciñas de Ames. O servizo da rede de comedores escolares, un servizo xestionado directamente polo Concello, está dirixido ao alumnado de infantil e primaria. Actualmente, hai 1.384 alumnos/as matriculados/as nos comedores escolares para o curso 2021-2022. Deste total, 104 usuarios/as teñen un tratamento alimentario específico debido a algún tipo de alerxia ou intolerancia.

Novas relacionadas

El Correo Gallego: "Interese na Deputación de Lugo polos comedores"

Enfoques: "La Diputación de Lugo se interesa por el modelo de gestión de los comedores de Ames"