Efectivos do Tedax investigaron o contido dunha maleta situada nunha beirarrúa do polígono do Milladoiro, que resultou ser unha falsa alarma

Xoves, 19 de setembro de 2013

[19-09-2013] Efectivos do Tedax (Técnico Especialista en Desactivación de Artefactos Explosivos) da Garda Civil achegáronse este mediodía ata o Milladoiro para investigar e analizar o contido dunha maleta que apareceu abandonada nunha beirarrúa do polígono industrial do Milladoiro. Finalmente, e tras as comprobacións pertinentes, resultou ser unha falsa alarma. Ata a zona tamén se desprazaron efectivos da Garda Civil e da Policía Local de Ames.

A maleta atopouse nunha beirarrúa da Rúa das Hedras, próxima ao campo do fútbol do Milladoiro. O aviso foi dado por un veciño da zona á Garda Civil do Milladoiro. Ata o lugar, que foi acordonado, tamén se desprazaron membros da Policía Local de Ames.

Seguidamente, chegaron á zona os efectivos do Tedax, procedentes da Coruña, que examinaron a maleta mediante cans adestrados e cun robot, que abriu a maleta para comprobar o seu contido. Ata o lugar tamén se desprazaron o alcalde de Ames, Santiago Amor, e numerosos medios de comunicación.