A Escola Municipal de Música encara o final do curso cunha serie de actuacións que comezan hoxe, 10 de xuño, e que se estenderá ata o 18 de xuño, uns días antes do peche do período lectivo, e co fin de preparar o seu concerto de fin de curso, que terá lugar o xoves 20 de xuño, ás 19:30 horas, no aparcadoiro da Casa da Cultura do Milladoiro. Os profesores encargados do desenvolvemento destas actuacións son Antonio Bravo, Amaury Quintero, Sergio Piñeiro, Pilar Martínez, Noelia Ramos e Eva Millares.

As audicións terán lugar na aula 10 da Escola Municipal de Música de Ames, situada en Aldea Nova, sempre en horario de tarde e non antes das 17:00 horas. Os alumnos e alumnas interpretarán diversas pezas de diferentes estilos musicais antes as súas familias, compañeiros e amizades. Tamén poderán asistir a estas audicións aquelas persoas que queiran coñecer o funcionamento da escola e ver o traballo que alí se realiza; así como quen estea pendente da apertura do prazo de inscrición para novo alumnado.

O alumnado de percusión será o encargado de arrincar as audicións, o luns 10 de xuño, ás 18:30 horas. Esa mesma semana, o mércores 12 de xuño, terán lugar as actuacións de guitarra, ás 17:00 horas.

O xoves, día 13, será a quenda da audición de canto e frauta, que se desenvolverá a partir das 18:00 horas. Finalmente, o martes 18 de xuño concentraranse as audicións de saxo e piano, que se desenvolverán ás 18:00 e 19:00 horas, respectivamente.