Dende o 26 de abril e ata o 26 de maio están dispoñibles para a súa solicitude as axudas a entidades de iniciativa social sen ánimo de lucro, que neste exercicio ascenden aos 60.000 euros.

O Concello de Ames busca deste xeito favorecer a posta en marcha de actividades de carácter básico e social complementarias ao labor xa realizado a través dos servizos sociais do Concello, ademais de continuar a súa colaboración coas entidades de iniciativa social sen ánimo de lucro.

Os obxectivos desta liña de axudas son a promoción da inclusión social de colectivos con dificultades de inserción; a instauración de programas de base comunitaria que desenvolvan accións preventivas; a intervención e o seguimento de persoas en risco de exclusión social; a realización de xornadas, charlas e divulgación dos efectos de determinadas enfermidades e adicións ou a formación básica e laboral adaptada ás necesidades de persoas con diversidade funcional. A contía máxima destinada a esta convocatoria de 2023 ascende a 60.000 euros.

No exercicio de 2022 beneficiáronse das subvencións un total de oito entidades, obtendo un total de 51.359,85 euros que serviron para promover un total de quince proxectos que abarcaron dende a promoción da autonomía persoal dos integrantes das asociacións, os alugueiros de locais, actividades de educación emocionar, a intervención da comunicación e linguaxe ou labores de información e orientación.

Entidades destinatarias e presentación de solicitudes
Poderán optar a estas subvencións as entidades de iniciativa social sen ánimo de lucro legalmente constituídas, que realicen actividades complementarias aos Servizos Sociais comunitarios, e que desenvolvan a súa actuación, entre outros ámbitos, no Concello de Ames.

As entidades de iniciativa social sen ánimo de lucro deben estar inscritas no Rexistro de asociacións da Xunta de Galicia e atoparse ao corrente no momento da solicitude e do pagamento no cumprimento das súas obrigas tributarias coa AEAT, co Concello de Ames, así como, coa Seguridade Social. As entidades solicitantes non poderán ter pendente de xustificación ningunha axuda anterior do Concello, a non ser que lle fora concedida unha prórroga.

As solicitudes deberán presentarse a través do rexistro telemático na Sede electrónica do Concello ou no rexistro de calquera administración pública adherida á plataforma de intercambio rexistral (SIR), en cumprimento do artigo 14.2 da Lei 39/2015, do 1 de outubro, do procedemento administrativo común das administracións públicas. En caso de que unha entidade solicite a subvención para varios proxectos deberá presentar unha solicitude por cada proxecto de actuación. O prazo para presentar as solicitudes está aberto ata o venres 26 de maio.