Esta convocatoria de axudas está destinada a promover actividades desenvolvidas durante este ano polas asociacións e clubs deportivos do Concello de Ames. Poderán ser subvencionadas as actividades de índole deportiva desenvolvidas polos clubs e asociacións deportivas, así como a adquisición de material inventariable, cun límite dun 20 % do orzamento total. Non se subvencionará a realización de obras. As actividades ou investimentos para as que se solicite a concesión da achega deberán ter sido efectuados dentro do exercicio 2016. O importe individual das achegas concedidas non poderá superar os 8.000 euros.

A estas axudas poderán optar as asociacións e clubs existentes no Concello de Ames, legalmente constituídas, e que figuren inscritas no rexistro municipal de asociacións. Ademais, os datos de inscrición no rexistro deben estar debidamente actualizados no momento de solicitar a achega. As asociacións solicitantes teñen que estar ao días nas súas obrigas tributarias (AEAT e Concello de Ames), así como coa Seguridade Social. As entidades solicitantes tampouco poderán ter pendente de xustificación ningunha axuda anterior do Concello, a non ser que lles fora concedida unha prórroga.

Todos os clubs con subvención superior a 5.000 euros terán que levar na súa vestimenta (chándal e camiseta competición) o logo do Concello de Ames e, en caso de dispor de furgoneta, un adhesivo do citado logo. Os obxectivos destas axudas son achegar a práctica deportiva ao maior número posible de individuos e promover a participación activa dos veciños e veciñas no deporte, como medio de promover a formación dos máis novos e de propiciar a convivencia.

As bases inclúen un novo sistema de valoración
As novas bases contemplan un novo sistema de valoración que foi tratado no Consello consultivo de deportes nos pasados meses. O goberno municipal e as entidades deportivas chegaron a un acordo despois de varias reunións onde os clubs e entidades fixeron diferentes achegas. Por vez primeira os clubs e entidades deportivas participaron na elaboración destes criterios e coñecen de antemán como van a ser valoradas estas subvencións.

Dentro destas modificacións está o feito de incluír un apartado de valoración pola solicitude de achegas doutros organismos ou a colaboración das entidades co Concello nas actividades desenvolvidas polo ente municipal. Cabe destacar que dende este ano quítase da valoración das subvencións o carácter de cofinanciamento que existía, o que axilizará a xustificación e pago das axudas. Outro dos aspectos novos é a inclusión de parámetros de valoración da presenza feminina nas entidades deportivas que primarase con ata 10 puntos. As participacións nas competicións, o número de equipos e categorías, e o número de beneficiarios serán os aspectos principais a valorar e que contarán con ata o 67% da subvención.

O alcalde e concelleiro de Deportes, José Miñones, afirma que "as axudas de concorrencia competitiva que abrimos este ano por primeira vez contan coa participación e coñecemento das entidades de antemán, o que facilitará moito a súa previsión. Ademais é obxectivo deste goberno acelerar o proceso de pago destas e outras axudas e por iso de cara ao próximo ano a convocatoria sairá a primeiros de ano".

O prazo para presentar as solicitudes a esta convocatoria de axudas será dun mes desde a publicación das bases no Boletín Oficial da Provincia. En caso de rematar nun día inhábil, este prazo entenderase estendido ata o inmediato hábil seguinte. Hai que ter en conta que as bases desta convocatoria de axudas foron publicadas no BOB o día 19 de outubro de 2016. Os interesados e interesadas deberán presentar a documentación solicitada nas bases. As solicitudes deberán presentaranse no Rexistro xeral do Concello ou nalgún dos rexistros municipais auxiliares, de xeito presencial ou a través da sede electrónica.