Despois do éxito doutras actividades como a primeira saída ao campo que se levou a cabo o pasado 12 de outubro, ou o curso de iniciación no mundo cos cogomelos do 19 de outubro, segue a programación micolóxica do Concello de Ames no mes de novembro a cargo da Aula da Natureza.

Nesta nova actividade, na que quedan unhas poucas prazas dispoñibles, realizarase un maior afondamento no mundo dos cogomelos co uso de claves, cultivo e posterior cociñado. Desta maneira, pola mañá realizarase un pequeno resumo do curso anterior de iniciación no mundo micolóxico, para aquelas persoas que non puideron asistir a esa primeira xornada.

Posteriormente, terá lugar unha saída no entorno da Aula, na que se levará a cabo un maior afondamento en especies máis peculiares de cogomelos. Xa pola tarde, abordaranse as súas diferentes opcións de cociñado e conservación.

Aberta a inscrición para a última actividade micolóxica
O día 23 de novembro terá lugar a última das actividades programadas. Será unha saída ao campo fóra do termo municipal de Ames. A actividade, guiada pola experta Sira López, axudará aos participantes no recoñecemento e identificación de cogomelos. O horario da mesma é de 10.30 a 16.00 horas e o número de prazas é de 50 previa inscrición, das cales quedan algunhas dispoñibles.

As persoas que estean interesadas nas actividades, poden apuntarse enviando un correo electrónico ao enderezo auladanatureza@concellodeames.gal. Para máis información sobre estas xornadas micolóxicas, pódese chamar ó 660 004 665.

Novas relacionadas:

Lindeiros: "Curso micolóxico coa Aula da Natureza de Ames"