[15-12-2012] A localidade do Milladoiro acolleu hoxe a primeira xornada do VII Festival de Maxia. Pola mañá o mago Charly impartiu un obradoiro de maxia que estivo dirixido aos rapaces e rapazas de 8 a 14 anos. Xa pola tarde, no auditorio da Casa da Cultura do Milladoiro desenvolveuse a Gala Máxica, na que varios magos nacionais e internacionais fixeron gozar a veciñanza amiense con trucos e ilusións. Ademais, ao longo de todo o día houbo diferentes sesións de maxia na carpa do misterio, que estivo instalada na praza de Manuel Murguía. Estas mesmas actividades desenvolveranse durante este domingo na praza da Maía e na Casa da Cultura de Bertamiráns.
Festival de Maxia en Bertamiráns
Estas mesmas actividades desenvolveranse durante este domingo na praza da Maía e na Casa da Cultura de Bertamiráns. Para o obradoiro que imparte o mago Charly xa se esgotaron todas as prazas dispoñibles, polo que un total de 25 nenos e nenas de 8 a 14 anos participarán nesta actividade. En Bertamiráns, a carpa do misterio estará instalada na praza da Maía. Ao igual que no Milladoiro haberá sesións de maxia pola mañá, de 12:00 h a 14:00 horas, e pola tarde, de 16:30 h a 18:00 horas.
A actividade estrela realizarase ás 18:30 horas no auditorio da Casa da Cultura desta localidade. Nesta caso o espectáculo tamén estará presentado por Carlos Adriano e contará coa participación do mago Dani Polo, o mago Rafa, o mago Teto, e o mago Sasha. Para este espectáculo xa non quedan entradas á venta, polo que o auditorio da Casa da Cultura de Bertamiráns rexistrará un cheo absoluto e as 216 butacas das que dispón estarán ocupadas.
Un ano máis o Concello de Ames organizou unha nova edición do Festival de Maxia que se está desenvolvendo durante esta fin de semana nas localidades do Milladoiro e de Bertamiráns. Esta actividade organizada pola Concellaría de Cultura intenta achegar á cidadanía amiense o espectacular mundo dos magos. Nesta edición participan seis ilusionistas que proceden de diferentes puntos de Galicia, España e mesmo do estranxeiro.
O Festival de Maxia comezou este sábado na localidade do Milladoiro, onde a veciñanza gozou coas actividades que se desenvolveron ao longo de todo o día. Pola mañá, arredor de 15 nenos e nenas participaron no obradoiro de maxia que impartiu o mago Charly. Este ilusionista achegoulle os segredos da maxia aos rapaces e rapazas de 8 a 14 anos. Esta actividade desenvolveuse na Casa da Cultura do Milladoiro.
Ao mesmo tempo que se desenvolveu este obradoiro, na carpa do misterio que estivo instalada na praza de Manuel Murguía, realizáronse varias sesións de maxia. Estes espectáculos, que se desenvolveron en horario de mañá, de 12:00 h a 14:00 horas, e de tarde, de 16:30 h a 18:00 horas, estiveron dirixidos a todos os públicos (nenos/as e adultos). Fixéronse pases cada 30 minutos, polo que ao longo do día houbo sete sesións de maxia.
Pero o prato forte do día foi pola tarde coa Gala Máxica que se desenvolveu ás 18:30 horas na Casa da Cultura do Milladoiro. Este espectáculo estivo presentado por Carlos Adriano e contou coa participación do mago Dani Polo, o mago Rafa, o mago Teto, e o mago Sasha. Arredor de 150 persoas encheron o auditorio da Casa da Cultura desta localidade. Esgotáronse todas as entradas que había a venta.