O Servizo de Atención Temperá dá nestes días os seus primeiros pasos para comezar a incluír á cativada amesá, despois de que o convenio para a súa posta en marcha fora firmado de maneira conxunta polos Concellos de Ames e de Teo no pasado mes de outubro.

O equipo de profesionais do SAT, que xa traballa con 24 nenos e nenas de Teo, está a contactar ás familias amesás que poden beneficiarse do servizo. Estas chegan derivadas de listaxes de centros de saúde e de ensino, dos propios servizos sociais municipais, ou ben da unidade de atención temperá do Hospital Clínico Universitario de Santiago, ao que ata o de agora acudían as crianzas ao non contar con este servizo a nivel municipal.

Deste xeito, o persoal establecerá entrevistas iniciais coas familias, coa intención de ter unha toma de contacto inicial e concretar as necesidades das nenas e nenos, así como a compatibilidade e dispoñibilidade horaria. Disporase que tipo de tratamento precisan as crianzas, e tratarase de adaptar os horarios de tal xeito que se poida prestar o servizo á cativada de ambos concellos.

O SAT xa traballa dende as súas novas instalacións dende o pasado luns 17, situadas na travesía das Galanas, un punto que malia estar no termo municipal de Teo é próximo e de acceso rápido aos dous núcleos de maior poboación de Ames, en especial ao Milladoiro. O novo local conta con tres grandes espazos diferenciados, cunha sala para a terapia ocupacional e dous despachos, dedicados á logopedia e á psicoloxía.

Nova reunión da Comisión Mixta de Coordinación do SAT

Mentres comezan a incorporarse as primeiras familias amesás ao servizo, os departamentos de Servizos Sociais de ambos Concellos traballan para pechar e regular  o catálogo de condicións de prestación do SAT. Este mesmo martes 25, Ames e Teo reuníronse na Comisión Mixta de Coordinación do servizo, no que debateron e comezaron a perfilar os criterios e o baremo para establecer as listas de agarda, no caso de que foran necesarias.

Unha vez pechados estes criterios e o catálogo de prestación de servizos, os acordos terán que ser aprobados en sesión plenaria, tal e como se estableceu no convenio asinado por ambas institucións municipais.

Datos de contacto e localización

O Servizo de Atención Temperá, posto en marcha de maneira conxunta entre os Concellos de Ames e Teo, ten as súas instalacións no enderezo Travesía das Galanas, 67, 1º andar (Teo), no que ofrece servizos de psicoloxía, logopedia e terapia ocupacional. Os números de teléfono de contacto son o móbil 604 014 894 e o fixo 881 023 475.

Novas relacionadas

El Correo Gallego: "Atención temperá comeza a contactar coas familias"

Compostela 24 Horas: "As familias de Ames comezan a incorporarse ao novo Servizo de Atención Temperá municipal"