O Encontro celebrado en Bertamiráns, que durou unha hora na que se combinaron música e palabras, tivo como obxectivo promover a transmisión interxeracional da lingua galega e está encadrado no programa Axóuxeres 2012. Os nenos e nenas pasaron un anaco moi entretido cantando e escoitando contos coa familia dos Axóuxeres, formada por Lúa, Antón, Iria, Xan, Pelouro, Moncho e R01.

Os Axóuxeres é un programa organizado pola Secretaría Xeral de Política Lingüística, que nesta ocasión contou coa colaboración do Servizo de Normalización Lingüística do Concello de Ames, e co que se quere axudar os pais e nais a manter a cadea de transmisión da lingua galega, ofrecéndolles espazos de lecer para a familia na nosa lingua e ferramentas para aprender, cantar e xogar en galego cos fillos. Os Encontros dos Axóuxeres é un espectáculo para os cativos e para toda a familia. Axóuxeres é a primeira viaxe polas palabras para os máis pequenos da casa.

A nova edición dos Axóuxeres inclúe, ademais dos encontros teatrais, unha serie de televisión, 20 sesións de cinema interactivo para cativos de tres a seis anos e xogos e cancións para descargar ao ordenador, tableta ou teléfono móbil. Deste xeito, os nenos e nenas galegas poden gozar das peripecias dos Axóuxeres dende as súas casas, no espazo televisivo do mesmo nome que se emite no Xabarín Club dende o luns 22 de outubro. En cada episodio, a divertida familia de xoguete enredará cos nenos para que o pasen moi ben e, ao mesmo tempo, vaian aprendendo a falar. Os 39 capítulos de nove minutos poderanse ver na segunda canle da televisión pública de Galicia de luns a venres á mañá, ao mediodía e pola tarde.

Contido relacionado

El Correo Gallego: "Máis de 120 nenos e nenas de Ames cantaron e bailaron no Encontro dos Axóuxeres"