Pestanas principais

Marta Rodríguez Lorenzo, Antonio Rodríguez Núñez e Seur foron galardoados na gala dos Premios Down Compostela

Venres, 21 de marzo de 2025

A Fundación Down Compostela celebrou este xoves, 20 de marzo, na sala Mozart do auditorio de Galicia, a gala de entrega dos XII Premios Down Compostela, cos que a Fundación recoñeceu o traballo de Marta Rodríguez Lorenzo, veciña de Ames, Seur e Antonio Rodríguez Núñez. A gala estivo presentada por Irene Rodríguez-Toubes, unha moza con trisomía 21, e mailo xornalista amesán, Diego Viaño. Por parte do Concello de Ames asistiron a concelleira de Benestar Social e Igualdade, Uxía García, e a concelleira de Promoción Económica, Ana Belén Paz. Ademais, durante a gala actuou o artista Fran Allo, tamén veciño de Ames, que presentou un tema do seu novo proxecto.

O acto celebrouse este xoves 20 de marzo na sala Mozart do auditorio de Galicia, presidida pola alcaldesa de Santiago, Goretti Sanmartín; pola conselleira de Política Social, Fabiola García; e polo presidente da Deputación da Coruña, Valentín González Formoso. Á gala asistiron máis de 250 persoas, entre as que se atopaban o reitor da USC, Antonio López; directoras xerais da Xunta de Galicia, alcaldes de concelleiros/as de varios municipios nos que ten presenza Down Compostela. Por parte do Concello de Ames asistiron a concelleira de Benestar Social e Igualdade, Uxía García, e a concelleira de Promoción Económica, Ana Belén Paz.

A concelleira de Benestar Social e Igualdade, Uxía García, explica que “dende o Concello de Ames trataremos de seguir apoiando á Fundación Down Compostela co obxectivo de favorecer á inserción sociolaboral das persoas participantes nos Programas de Emprego con Apoio e Inclusión Social. A comezos deste mes de marzo asinamos un convenio para que membros de Down Compostela participasen na quinta edición do InnovAmes como actividade complementaria á súa formación no Programa de Emprego con Apoio e Inclusión Social, enmarcado no Servizo de Promoción da Autonomía Social (SEPAP). Este convenio fixo posible que tres veciños e veciñas do concello de Ames puideran seguir sumando experiencias laborais para completar a súa formación”.  

Gala de entrega dos XII Premios Down Compostela
A gala estivo presentada por Irene Rodríguez-Toubes, unha moza con trisomía 21, e mailo xornalista amesán, Diego Viaño. Na lectura do manifesto institucional polo Día Mundial da Síndrome de Down, ademais de reivindicar unha sociedade máis inclusiva, Irene Rodríguez-Toubes, reclamou os dereitos das persoas con trisomía 21 e lembrou que “é moito máis o que nos une que o que nos diferenza. As persoas con síndrome de Down sentimos, pensamos, queremos, crecemos e ilusionámonos coma calquera”.

Irene deu paso ao videoclip Inclusión en Compostela, unha canción feita con intelixencia artificial na que os seus compañeiros e compañeiras do programa de inclusión social alzan a súa voz para asegurar “queremos inclusión e loitaremos por ela”. “Non somos invisibles, podemos cambiar o destino” asegura a letra creada polas propias persoas con discapacidade que quixeron facer resoar a súa voz.

Durante a súa intervención, o presidente da Fundación, Juan Martínez, agradeceu o traballo das persoas galardoadas por axudar “a que se escoite a voz das persoas con discapacidade, por axudarlles a tomar as súas propias decisións, a cambiar o seu destino e para que se lles recoñeza o seu esforzo”, como fixeron Seur Geopost ou Antonio Rodríguez Núñez nos últimos anos. O presidente tivo recoñecemento especial para Marta Rodríguez Lorenzo, que foi directora de Down Compostela durante máis de vinte anos.

Os/as premiados/as
Antía Losada e Pablo Balado entregáronlle o galardón a Antonio Rodríguez Núñez, do que resaltaron a súa visión para contar coas persoas con trisomía 21 e ter en conta as súas achegas nalgunhas das investigacións que dirixe dende IDIS, e tamén por facilitar a sensibilización do alumnado de Enfermería da USC.

Por outra banda, Manuel Otero contou durante a gala a súa experiencia como traballador en Seur Santiago dende hai tres anos, antes de entregarlle o galardón á responsable de recursos humanos da zona noroeste da firma, Carla Salgado Fernández. Con este galardón, a fundación recoñeceu a aposta que fixo a empresa en Santiago por incorporar ao mercado laboral a persoas con discapacidade intelectual.

Por último, Daniel López e Daniel Martínez foron os encargados de darlle o premio a Marta Rodríguez Lorenzo, veciña de Ames, quen durante os case 25 anos que traballou como directora da entidade converteuse nun referente para as familias e puxo en marcha moitos dos programas que contribuíron a mellorar a calidade de vida das persoas con síndrome de Down.

Novas relacionadas:

AMSGO!: "A Fundación Down Compostela premia a Marta Rodríguez Lorenzo, Antonio Rodríguez Núñez e Seur polo seu compromiso coa inclusión"

Marta Rodríguez Lorenzo, Antonio Rodríguez Núñez e Seur foron galardoados na gala dos Premios Down Compostela

Multimedia

  • Marta Rodríguez Lorenzo, Antonio Rodríguez Núñez e Seur foron galardoados na gala dos Premios Down Compostela