O ciclo Abril de Cine 2025 comezou o pasado xoves, 3 de abril, coa proxección do filme “Prefiro condenarme”, de Margarita Ledo. O obxectivo deste programa é  achegar o cinema galego actual á veciñanza amesá. As dúas primeiras sesións son longametraxes en formato documental, mentres que na última sesión poderanse ver catro curtametraxes que van dende a comedia filosófica á animación pasando de novo polo  formato documental.

Nas proxeccións destas curtas e longametraxes atopamos un nexo común, o fío vertebrador deste ciclo de cine de abril: o desarraigamento. Cada unha das personaxes, a súa maneira, vese afastada da realidade común, disociada das súas emocións, dubidosa sobre o seu futuro... mesmo a intelixencia artificial non sabe como acoutar este sentimento tan humano. É precisamente este sentir, vivido por todos nós de cando en vez, dun xeito complicado pero fermoso, o que permite achegarse ás diferentes problemáticas ás que se enfrontan os protagonistas das proxeccións.

Filmei paxaros voando
A segunda das sesións terá lugar o vindeiro xoves, 10 de abril, coa proxección do documental “Filmei paxaros voando”, de Zeltia Outeiriño González. Despois de 20 anos vivindo en Barcelona, Zeltia volta a Galicia para filmar a memoria do seu admirado tío Antonio, un artesán téxtil que viviu intensamente na década dos 80.

Este retorno provoca o encontro coa súa nai Socorro, unha muller conservadora á que Zeltia nunca quixo parecerse. O repentino empeoramento na saúde de Socorro cambia a mirada de Zeltia, que descubrirá un camiño de volta a casa difícil, pero tamén cheo de amor e coidados. Entre rodaxes e coidados, nai e filla atopan un espazo para sandar vellas feridas e compartir momentos de complicidade e amor.

A sesión contará cunha presentación previa á proxección da película e, ao finalizar, haberá un coloquio coa directora do filme, Zeltia Outeiriño.

A directora: Zeltia Outeiriño González
Nada en Madrid en 1978, trasladouse de moi nova a Galicia, onde viviu ata os 23 anos. É licenciada en Publicidade pola Universidade de Vigo e en Comunicación Audiovisual pola Universidade de Barcelona. Traballou no audiovisual e na produción en Cataluña. Actualmente é profesora de Imaxe e Son, realizadora de vídeo freelance, documentalista e facilitadora audiovisual en procesos de creación audiovisual colaborativa con grupos socialmente fráxiles desde o colectivo As Mirillas (Barcelona), do cal é fundadora.

Dirixiu películas documentais individuais e colectivos, seleccionados e premiados en diversos festivais, como “Vientos de Resistencia”, “Kaugsankamalla, muiurrisunchi (Mentres vivamos, dancemos)”, “El Futur és nostre” ou “Bazar Solidario”. A súa primeira longametraxe documental é “Filmei paxaros voando”, gañadora do premio a mellor documental nos premios Mestre Mateo 2025.

Noite de curtas
Na última das sesións, que se realizará o martes día 22 e abril, as protagonistas serán as curtametraxes. Por un lado, “Platónico, platónica”, de Xacío Baño, na que se fai unha reflexión e conexión profunda entre o amor e a intelixencia artificial.

Outra das curtas que se proxectará nesta sesión será “Noites de prata” de Soraya Antelo, un proxecto, finalista nos Premios Mestre Mateo deste pasado 2024, que narra a historia de como Lola, unha cantante de boleros, abandonou Galicia polas terras do Río da Prata.

A terceira das curtas será “Carracedo” de Manu Lucas Mariño, un documental que amosa a vida agochada tras o lutier contemporáneo membro do grupo galego De Ninghures.

A última das curtas que se proxectará nesta sesión será “Pechar caixas, abrir caixas” de Hugo Amoedo, un filme na que se narra a historia da volta a Galicia do escritor Xavier Queipo despois de máis de 30 anos en Bruxelas.