Este xoves, día 30, as bibliotecas municipais de Ames celebran unha nova edición dos encontros literarios do curso 2022-2023, unha das súas principais actividades de adultos. Nesta ocasión preséntase a obra “El eco de tu voz”, de Juan Galán, que está editada por Medulia. A entrada é libre ata completar aforo.

“El eco de tu voz” narra a vida de Adela, que conta a súa historia a través da súa propia voz, pero tamén da doutras mulleres que coñece. A obra é tamén a historia dun amor apaixonado entre Fabiana Ponte, a avoa anarquista da obra, e a escritora británica Virginia Woolf, unha trama que se desenvolve no ano 1916 na cidade da Coruña.

Segundo Juan Galán, o libro xira arredor da emancipación da muller e, especificamente, da independencia que a muller escritora debe ter para crear”. O autor asegura que “esta é unha obra froito da miña fantasía. Quere ser unha novela histórica na que se mesturan elementos históricos e inventados. As personaxes de Adela e Fabiana son ficticios, aínda que conteñen algúns rasgos autobiográficos, pero tamén aparecen feitos históricos acaecidos en diversas épocas e personaxes reais como Virginia Woolf, Emilia Pardo Bazán e Santiago Casares Quiroga e familia, sobre os que consultei diarios, memorias e abundante biografía".

O acto contará tamén coa presenza de Francisco Leira Castiñeira, historiador e profesor da USC. A encargada de presentalo será a concelleira de Cultura de Ames, Natividade González.

O autor
Galán (A Coruña, 1961) é licenciado en Filoloxía Inglesa pola USC. Viviu en diversos países e continentes, e traballou como profesor de inglés. Tras exercer a docencia durante máis de trinta anos, xubilouse recentemente. A súa carreira literaria iniciouse coa publicación de "Romanza de los naranjos en flor". Ademais, destaca como investigador da Memoria Histórica Democrática, e adícase a contar a historia dos presos republicanos que sufriron a represión franquista organizando rutas a pé por Galicia, as Rutas Republicanas.

Novas relacionadas:

El Correo Gallego: "Juan Galán presenta este xoves o seu libro 'El eco de tu voz', no Pazo da Peregrina"

AMS GO!: "Juan Galán presenta 'El eco de tu voz' este xoves no encontro literario de Ames"