Este venres 31 chega ao auditorio de Bertamiráns “Entrega en man” de Contraproducións S.L., unha peza teatral incluída dentro da programación do Ames Cultural 2025. A obra narra temáticas de forte carga social como o racismo, o machismo ou a xenofobia, a través dun humor negro que permite reflexionar sobre este tipo de situacións dun xeito diferente. Esta programación forma parte do convenio de colaboración entre a Axencia Galega das Industrias Culturais (AGADIC) e o Concello de Ames.

Versionada e dirixida por Cándido Pazó, “Entrega en man” é unha obra orixinalmente de Martin McDonagh, que amosa a historia de Carmichael, un supremacista branco estrafalario e agresivo que ofrece unha recompensa por recuperar a man que lle cortaron durante a adolescencia.

Neste proceso, un mozo negro chamado Toby e a súa moza branza Marilyn, pretenden enganar a Carmichael ofrecéndolle unha man roubada dun museo e que non é a súa. Entretanto, intervén Mervyn, o recepcionista do hotel no que se pretende realizar o intercambio e, nese intre, é cando se desenvolve toda a narrativa da obra.

As persoas interesadas en asistir a esta representación, poden adquirir os seus convites na Billeteira electrónica do Concello de Ames. Ata o momento, a ocupación para esta peza é aproximadamente do 62% das butacas dispoñibles.

Sobre Contraproducións S.L.
Con máis de 15 anos de actividade ás súas costas, a compañía Contraproducións, adoita a relatar un teatro cunha forte intención crítica e interacción co público. O grupo, liderado por Cándido Pazó, autor e director teatral de referencia dentro do panorama galego, con Belén Pichel como xefa de produción, conta con numerosos recoñecementos e premios no seu palmarés.

Ademais, o elenco actoral que participa en “Entrega en man”, está formado por actores e actrices recoñecidos no panorama galego, como Evaristo Calvo, Santi Romay e María Roja, pero tamén conta con profesionais do estranxeiro, como o actor brasileiro Diogo Sales.

Novas relacionadas:

La Voz de Galicia: "Elefante Elegante abre este venres en Ames a programación do Apego do 2025"