- Tematica
O Concello de Ames, a través do departamento de Cultura, continúa coa programación de artes escénicas neste primeiro semestre do 2025. Nesta ocasión, o auditorio do Milladoiro acollerá este venres, ás 20.30 horas, a estrea de TROMSØ, a nova peza teatral da compañía Morraoconto. As portas abriranse ás 20.15 horas e prégase puntualidade a todas as persoas asistentes. Esta programación forma parte do convenio de colaboración entre a Axencia Galega das Industrias Culturais (AGADIC) e o Concello de Ames.
O auditorio do Milladoiro volverá a acoller este venres unha nova estrea de artes escénicas. Desta vez, coa primeira representación da peza TROMSØ, da compañía teatral Morraoconto. A partir das 20.30 horas, o público poderá gozar dunha comedia na que, ademais de rir, poderán reflexionar sobre temas tan universais como a pena, a morte e a vida.
Sinopse de “ TROMSØ”
A obra trata desde unha clave humorística, a reflexión sobre a vida e a morte partindo da perda dun ser querido e o baleiro e silencio que nos pode deixar a mesma. TROMSØ é un canto á tristura pero tamén á esperanza, polo que remata sendo unha viaxe por todas as fases e emocións derivadas deste proceso de perda. A pesar de ser narrada desde unha experiencia persoal e cun contexto específico, calquera persoa se pode sentir indentificada coa temática e argumento desta obra.
Sobre Morraoconto
A compañía Morraoconto, especializada tanto en teatro coma en danza, comezou a andar no 2021, da man de Rafa Martínez, Lara Pouso e Miguel Gendre. Dende entón, traballouse por crear un grupo no que convivan diferentes disciplinas das artes escénicas por igual, sentando as bases en distintos eidos como na creación escénica, o audiovisual, a música, a danza, a divulgación e a formación. A través da xuntanza de todos estes ámbitos e elementos das artes escénicas, Morraoconto aposta por realizar un teatro comprometido, sustentado na liberdade creativa, a experimentación e a denuncia social.