- Tematica
Bugallido continúa coas súas xornadas sobre saúde enmarcadas no programa “Abril, mes da saúde en Bugallido”. Deste xeito, o Centro Cultural Mahía acolle no día de mañá, 3 de abril, ás 19.30 horas, a segunda sesión, co relatorio “Vacinas. Salvando vidas”, impartido por Pablo Varela García, internista da Unidade de Enfermidades Infecciosas do CHUS. A entrada será libre ata completar aforo e pode achegarse calquera persoa interesada en participar.
A Asociación Veciñal de Bugallido, en colaboración co Centro Cultural Mahía e a Sociedade Agraria de Bugallido, Ortoño e Biduído, continúa coas sesións da segunda edición do seu ciclo de xornadas sobre saúde, nas que o obxectivo é achegar a toda a veciñanza aspectos fundamentais e básicos relacionados co ámbito sanitario e o noso benestar físico.
Neste senso, este xoves, ás 19.30 horas, o Centro Cultural Mahía acollerá a segunda das sesións previstas dentro da programación, co oratorio “Vacinas. Salvando vidas”, a cargo do internista da Unidade de Enfermidades Infecciosas do CHUS, Pablo Varela García. Nesta xornada divulgarase a importancia das vacinas para loitar contra as enfermidades infecciosas, así como desmontar os bulos e mitos arredor delas.
As xornadas restantes para celebrar o mes da saúde en Bugallido, desenvolveranse os vindeiros días 10 de abril, coa charla “Máis aló da pel e as mucosas”, e o 24 de abril, co relatorio “Coñecendo a medicina de precisión. Que é a Medicina Nuclear?”, que poñerá o peche final a estas sesións de divulgación.
Obradoiro de primeiros auxilios
O Ciclo de Xornadas da Saúde, “Abril, mes da saúde en Bugallido”, inaugurouse na tarde do pasado xoves, 27 de marzo, coa celebración dun obradoiro de primeiros auxilios no que, finalmente, participaron arredor de 40 persoas.
A actividade, impartida pola enfermeira do Servizo de Urxencias do CHUS, Olga Prados Nieto, ofreceu ao longo de catro horas unha formación sobre como responder ante algunhas das situacións de emerxencia máis frecuentes coas que nos podemos atopar na nosa vida diaria. Deste xeito, os participantes adquiriron pautas básicas, tanto a nivel teórico coma práctico, sobre como actuar ante, por exemplo, unha dor torácica, unha perda de coñecemento ou saber realizar de forma axeitada unha reanimación cardiopulmonar básica por atragoamento.
Novas relacionadas:
AMSGO!: "O Centro Cultural Mahía acolle mañá a segunda sesión do ciclo de xornadas sobre saúde"