Este pasado sábado, día 19 de marzo, o pavillón de Bertamiráns acolleu unha apaixonante competición de voleibol. O recinto polideportivo acolleu dende as 10:00 h. da mañá o play off da fase final da Liga Provincial Xuvenil Feminina de A Coruña de voleibol, no que o Club Voleibol Bruxas se fixo co terceiro posto.

A xornada abriuse ás 10:00 horas coa disputa da semifinal entre o AD Xiria Asesoría Cervantes de Carballo e o Boiro Voleibol, na que pasou á final o club de Boiro. A segunda eliminatoria deu comezo ás 12:00 horas entre as locais do Club Voleibol Bruxas e as do Voleibol Dumbría, quedando eliminadas as xogadoras amienses. A xornada de tarde abriuse ás 17:00 horas coa disputa do encontro polo terceiro e cuarto posto entre o CV Bruxas e o AD Xiria de Carballo, gañando o equipo de Ames. A final xogárona dende as 19:00 horas o Voleibol Dumbría e o Boiro Voleibol, gañando as rapazas do Dumbría.

Na semifinal disputada pola mañá, o Bruxas atopouse coa mala sorte en forma de lesión dunha das súas mellores xogadoras e iso reduciu moito as posibilidades de vitoria das locais. Este foi un factor decisivo no desenvolvemento do encontro que finalmente se decantou a prol do Voleibol Dumbría, equipo que posteriormente se proclamou campión da fase final. Foi un partido disputado, no que ao final o éxito foi esquivo para o club local e é que como di Fernando Lizoain, presidente do CV Bruxas, "ao ser a un só partido, estas eliminatorias son unha lotería". Pero, a lotería que pola mañá non conseguiu caeulle en sorte pola tarde, onde se impuxo por 3 sets a 1 ao AD Xiria Asesoría Cervantes de Carballo quedando deste xeito en terceiro lugar no torneo.

Un terceiro posto meritorio, xa que na final de consolación o Club Voleibol Bruxas - IES de Ames enfrontouse ao primeiro clasificado da fase regular, o equipo de Carballo, que chegou a Bertamiráns acompañado dun gran número de afeccionados que, ao final da tarde, como comentou o propio Fernando Lizoain "marcharon un pouco tristes xa que tiñan esperanzas postas no seu club e ao final quedaron cuartas". Todo o contrario que os afeccionados amienses, que teñen que estar contentos polo esforzo feito polas nosas xogadoras, posto que como di o propio presidente do Bruxas: "temos que estar contentos, porque as rapazas pelexaron e ao final quedamos nun posto previsible porque fomos terceiros ao igual que durante a disputa da Liga e agora hai que mirar para adiante que o verdadeiramente importante vén o próximo fin de semana".

As rapazas da categoría de cadetes do CV Bruxas xogan este próximo domingo, de novo en Ames, a súa fase final. Un play off no que ten postas moitas esperanzas de gañar e loitar polo ascenso xa que quedaron primeiras na súa competición regular na provincia de A Coruña. Por iso, todos os veciños e veciñas amienses terán de novo unha cita co voleibol o domingo 27 de marzo no pavillón polideportivo de Bertamiráns.