Durante as últimas semanas o Concello de Ames estivo acondicionando dúas parcelas de Bertamiráns para habilitar novos aparcadoiros públicos. Estas parcelas están situadas na Travesía da Peregrina, antes do cruce coa avenida de José Luis Azcárraga, e na rúa do Cómaro, en fronte ao centro deportivo da Telleira. Con estes dous novos aparcadoiros amplíase de xeito considerable o número de prazas de estacionamento na localidade de Bertamiráns.

Dende este luns, 14 de abril, estes aparcadoiros xa están operativos e pódese estacionar neles. Estímase que estas dúas áreas de estacionamento teñen capacidade para arredor de 300 vehículos. Os traballos realizados consistiron en limpar as parcelas, achanzar o terreo, tapar as fochancas existentes e estender unha capa de grava.

Estes novos aparcadoiros únense ao xa existentes en Bertamiráns como son o aparcadoiro que está ao carón do centro comercial Carrefour, na rúa Pesqueiras; as dúas áreas de estacionamento que están ao carón da rúa Alcalde Lorenzo, o aparcadoiro próximo á rúa Xunqueira, e ao aparcadoiro público que está situado na rúa Lodeiro.

O concelleiro de Obras e Servizos Básicos, Gustavo Nieto, destaca que “todas as fincas que se acondicionan para as áreas de aparcamento son de titularidade privada, o que supón procesos de negociación cos propietarios que, ás veces, poden ser longos pero os acordos e negociacións son parte do traballo en política”. Deste xeito, explicou que “agora abrimos estas dúas novas áreas de estacionamento en Bertamiráns e, a falta de firmar o acordo, proximamente habilitarase tamén unha nova zona de aparcamento en Milladoiro con 300 prazas”.

Aparcamento para O Milladoiro
Nesta mesma liña estase traballando na localidade do Milladoiro. O Concello de Ames ten un acordo pechado cun/cunha propietario/a do Milladoiro para habilitar unha nova área de aparcamento nesta localidade. Neste caso só falta a tramitación administrativa do acordo para dispor deste novo aparcadoiro que disporá de arredor de 300 prazas de estacionamento.

Novas relacionadas:

La Voz de Galicia: "Ames abre dos nuevos aparcamientos en Bertamiráns y proyecta otro espacio similar en O Milladoiro"

El Correo Gallego: "Ames abre dous aparcamentos para trescentos vehículos en Bertamiráns"

Diario de Compostela: "Bertamiráns estrena dos nuevos parkings públicos y gratuitos"

Diario de Santiago: "O Concello abre dous novos aparcadoiros en Bertamiráns e ultima a apertura dunha nova área de estacionamento no Milladoiro"