En dita reunión participaron o vicepresidente e deputado de Turismo da Deputación da Coruña, Xosé Regueira, e o deputado de Patrimonio e Contratación da Deputación da Coruña, Xosé Lois Penas, con persoal técnico do departamento de Turismo e representantes dos concellos implicados (Ames, Brión, Santiago de Compostela, Val do Dubra e Teo).

Na xuntanza presentouse un informe final elaborado pola empresa Horizonte Norte, que foi elaborado polo arqueólogo director, Mario César Vila. El mesmo foi o encargado de explicar as liñas fundamentais dun documento que detecta as necesidades máis urxentes dos bens patrimoniais de Compostela Rupestre.

Este informe contempla unha revisión documental, ademais da catalogación e selección de cara a posta en valor e adquisición de terreos dos petróglifos e xacementos rupestres catalogados nos cinco concellos integrantes da mancomunidade da comarca de Compostela.

O documento será a base para a elaboración dun plan de xestión para conservar en difundir a arte rupestre nos concellos, o cal está financiado e promovido pola Deputación da Coruña, e que será obxecto de licitación neste 2020.

O equipo responsable do traballo detectou tamén petróglifos inéditos e propuxo medidas correctoras urxentes, como a limpeza de vexetación da contorna, dar información aos propietarios da existencia destes bens, fotogrametrías en detalle e a diagnose dos elementos e propostas de conservación.

Terreos con gravados rupestres singulares

O arqueólogo Mario César Vila tamén sinalou na súa explicación do informe que este tamén ofrece o estudo dunha proposta de selección para a adquisición de terreos con gravados rupestres singulares e características axeitadas. Ademais de propostas  propostas de cara á elaboración do plan de xestión e unha posible realización dun museo 3D virtual.  

Por último, acordouse convocar proximamente ao Consello asesor para validar os acordos, e estudáronse distintas propostas para a difusión e posta en valor de Compostela Rupestre.

O presidente do Consello de Dirección de Compostela Rupestre, David Santomil, apuntou á “necesidade de preservar a seguridade dalgúns dos bens patrimoniais”, en especial, despois das agresións producidas nalgúns petróglifos do territorio. Este foi o caso do petróglifo do Vilar, en Ames, no ano 2013, ou no do Castriño de Conxo no 2019. Tamén apuntou que nesta reunión “se presentou o plan de medidas urxentes a curto prazo e acordouse avanzar no proceso de licitación dun plan integral de xestión, para protexer, conservar e difundir o patrimonio arqueolóxico da comarca, en particular os seus petróglifos” .

Compostela Rupestre

A comarca de Santiago é un área rica en todo tipo de manifestacións rupestres e por iso xorde o Parque Compostela Rupestre. Un proxecto que une aos concellos de Ames, Brión, Santiago de Compostela, Val do Dubra e Teo ao redor do patrimonio cultural escrito nas rochas. Unha iniciativa que pretende achegar á cidadanía unha das áreas máis importantes na arte rupestre de Galicia.

Novas relacionadas:

Lindeiros: "Compostela Rupestre marca as prioridades"

El Correo Gallego: "Compostela Rupestre comprará fincas para preservar petroglifos"

La Voz de Galicia: "Compostela: 115 petroglifos y subiendo"