O Concello de Ames atópase inmerso nun proceso de modernización e mellora dos seus sistemas e aplicacións informáticas, cuxo obxecto é modernizar e mellorar a xestión municipal, aplicando as novas tecnoloxías da información e comunicación. O proxecto pretende ademais prestar uns servizos públicos de maior calidade ao cidadán, a empresas e colectivos especiais. Dentro deste plan atópase a instalación da Administración electrónica, proceso no que se está traballando a través de dúas fases de implantación de novos procedementos dixitais.

Para seguir avanzando neste eido a pasada semana visitouse o Concello de Lalín, xa que vén de implantar no pasado mes de febreiro un novo programa de xestión da Administración electrónica. Isto motivou o interese do Concello de Ames para saber o procedemento de implantación e o resultado do mesmo sete meses despois. Ames na actualidade está inmerso na implantación de diferentes procedementos da Administración electrónica por medio da Deputación coa plataforma TeDec.

O rexedor municipal e responsable das TIC, José Miñones, explica que “a implantación da Administración electrónica no Concello era practicamente nula, tal e como nos fixeron saber dende Deputación, sen expedientes que se xestionasen de xeito completo e con tan só un número limitado de procedementos que se lle ofrecían ao cidadán, o que nos levou a facer un plan de implantación novo”.

O novo plan púxose en marcha este ano e nel estableceuse o obxectivo de retomar os procedementos estancados, como é o módulo de secretaría ou o de portasinaturas. Asemade, recuperouse a formación do persoal municipal. Para elo, no primeiro semestre deste ano implantouse o módulo de decretos co que xa se está traballando ao 100%, xunto co portal de sinatura electrónica, a través do portasinaturas, tanto en plataforma para PC coma para dispositivos móbiles, o que permite a sinatura dos documentos dende calquera lugar.

Eliminación do papel nos trámites municipais
Ademais, impartiuse unha dobre formación ao persoal municipal para que saiban realizar a tramitación dos decretos. Paralelamente a estas implantacións o pasado mes de febreiro o Concello comezou a funcionar co novo sistema de intercambio de asentos electrónicos de rexistro SIR (Sistema de Interconexión de Rexistros), sendo un dos primeiros que o puxeron en marcha na provincia da Coruña e en Galicia. Con este sistema estase avanzando no cumprimento das novas leis 39/2015 e 40/2015 de procedemento administrativo común e de réxime xurídico do sector público, que regulan as relacións dixitais entre as Administracións e o cidadán. Dende o mes de outubro de 2016 as persoas xurídicas e as Administracións deben tramitar toda a documentación en formato dixital non sendo aceptado o papel, e todo o entregado no Rexistro pola veciñanza tamén é dixitalizado.

Durante o segundo semestre deste ano comezouse a traballar en formato dixital coa veciñanza. Este novo sistema irase aplicando de xeito progresivo ata implantalo ao 100%, co obxectivo de que o cidadán faga os seus trámites de xeito dixital e non sendo admitido o papel. Así, a partires do 1 de outubro o rexistro central do Concello de Ames xa non recollerá documentación en formato papel para as empresas que traballan coa administración, feito que xa se viña realizando no rexistro de Urbanismo. Por último, ao longo do primeiro semestre de 2017 traballouse tamén na emisión das tarxetas de empregado público dos tramitadores do Concello, de cara a fomentar o uso da sinatura electrónica e avanzar na implantación completa do módulo de Secretaría, coa tramitación das actas de xeito electrónico. Na actualidade hai preto de 60 tarxetas emitidas.

Notificacións electrónicas
No vindeiro mes de outubro comezaranse a notificar de xeito electrónico aos obrigados a elo, como son as persoas xurídicas, e tamén aos cidadáns que así o soliciten, utilizando o sistema Notific@, para o cal a semana pasada recibiron formación na Coruña varios traballadores e traballadoras municipais. Deste xeito poderase pechar o circuíto dixital da documentación, que comeza coa presentación en formato electrónico, a distribución automática aos departamentos, a súa tramitación electrónica e a sinatura a través do portasinaturas, rematando coa posibilidade de notificar electronicamente.

Miñones indica "pódese afirmar que Ames xa entrou na era dixital gracias ao esforzo dos traballadores e deste goberno. Conseguiuse avanzar na tramitación electrónica despois da parálise vivida anos atrás. Seguiremos traballando para afrontar importantes retos co obxectivo de ter un Ames 2.0 no vindeiro ano 2018".

Finalmente, o Concello ten previsto realizar un estudio da situación global das TIC, de cara a ordenar os diferentes procedementos e aplicativos para evitar duplicidades e sobrecustes. Con este estudio de situación, poderanse tomar decisións importantes e planificar os traballos que hai que executar no vindeiro ano co obxectivo de entrar na smartcity.

Contido relacionado

Ames Go: "Ames segue implantando a administración electrónica"
El Correo Gallego: "Ames quere implantar a xestión electrónica"
El Correo Gallego: "O Concello de Ames avanza na tramitación electrónica"