- Tematica
Con motivo da celebración do Día de Rosalía 2020, unha efeméride que terá lugar o vindeiro 24 de febreiro, o Concello de Ames, xunto cos municipios de Brión, Padrón e Santiago, e coa colaboración da Fundación Rosalía de Castro, organiza a actividade denominada “Caldo de Gloria”. Deste xeito, convídase aos establecementos do sector hostaleiro de Ames a que durante os días 22, 23 e 24 de febreiro sirvan cuncas de caldo de tapa, tanto durante as comidas como pola tarde nas ceas. Os locais adheridos recibirán un cartel e manteis de papel para utilizar esas datas. O prazo para apuntarse na devandita campaña estará aberto ata o vindeiro martes 18 de febreiro. Asemade, dentro desta iniciativa, o venres 21 servirase caldo galego na Rede municipal de comedores escolares.
A proposta que se lle fai, por terceiro ano consecutivo, ao sector hostaleiro de Ames é celebrar esta data tan sinalada, o Día de Rosalía, servindo nos diferentes establecementos o caldo que Rosalía de Castro describe no poema Miña casiña, meu lar de Follas Novas, e no que unha muller pobre conta como consegue, fronte ás adversidades que as rodean e ás súas propias penurias, facer un caldo de gloria. Con el non só logra alimentarse e sobrevivir: na súa humildade e ao pé do lume da lareira tamén é feliz.
Trátase dunha receita, tipicamente galega, que será ofrecida como tapa á hora da comida e da cea nos locais que se adhiran a esta iniciativa. Dende a Concellaría de Turismo, promotora da campaña, proponse que o caldo sexa servido durante a fin de semana (sábado 22 e domingo 23), así como o propio Día de Rosalía (o luns 24 de febreiro). Os locais adheridos recibirán un cartel e manteis de papel para utilizar esas datas.
O concelleiro de Turismo, Manuel Lens, explica que “dende o Concello de Ames animamos a todo o sector hostaleiro a que se sume a esta orixinal proposta co desexo de homenaxear a unhas das máis destacadas figuras das nosas letras, e vinculada ao noso concello tanto na súa vida como a través da súa maxistral obra. Os locais que se adhiran a esta campaña recibirán un cartel e manteis de papel para utilizar durante esas datas. Este é o terceiro ano que se desenvolve dita campaña, polo que agardamos poder superar o número de establecemos que se adheriron o pasado ano”.
Cuarta edición de Caldo de Gloria
Esta é unha iniciativa que puxo en marcha en 2017 a Fundación Rosalía de Castro e á que se uniu o Concello de Padrón. En 2018, ademais de Ames, sumouse o Concello de Brión. En 2019 sumouse tamén o Concello de Santiago de Compostela e este ano 2020 uniuse o Concello de Dodro. Deste xeito, nesta iniciativa participan os cinco Concellos que promoven a ruta As Pegadas de Rosalía. Para potenciar a participación activa nesta campaña crearase o pertinente hashtag ou cancelo e na páxina web http://rosalia.gal/ poderanse descargar tódolos materiais e textos relacionados co evento.
Para participar nesta campaña, ou ampliar información, tan só hai que comunicalo a través dos correos electrónicos manuel.lens@concellodeames.gal ou atencioncidada@concellodeames.gal. O prazo para apuntarse na devandita campaña estará aberto ata o vindeiro martes 18 de febreiro.
Novas relacionadas:
El Correo Gallego: "Caldo na honra de Rosalía nos bares amesáns do 22 ao 24"
