O Premio Calidade, outorgado pola Rede Española de Cidades Saudables, que Ames  vén de recibir, súmase a outros recibidos polo Concello nos últimos tempos como o Premio Progreso da Federación Andaluza de Municipios e Provincias polos servizos de conciliación ou o recoñecemento de Ciudad de la Ciencia e Innovación polo proxecto Innov@mes. En outubro de 2020, o Concello presentou o programa “Ames Saudable”, como proposta ao Premio, que acadou a súa terceira edición. Posteriormente, en marzo de 2021 o Concello recibiu a boa nova de que a súa proposta foi premiada como Premio Calidade.

O fomento dunha alimentación saudable, a promoción da actividade física en todas as idades e a prevención de condutas aditivas con e sen sustancias, son os eixos sobre os que se sustenta o programa “Ames Saudable”. Na proposta ao premio da RECS, ponse de manifesto o feito de que o programa, dependente da Concellaría de Promoción da Saúde, lévase a cabo dun xeito transversal e buscando acadar a equidade no acceso a saúde. Tamén se destacou o papel enriquecedor e diferenciador que desempeña a técnica municipal en nutrición ligada á Concellería de Promoción da Saúde.

O proxecto “Ames Saudable”, dependente da Concellería de Promoción da Saúde, aglutina toda unha serie de propostas dirixidas a todas as idades e encamiñadas a dotar de información e recursos á cidadanía, e ten como fin último lograr un concello cada vez máis saudable e un maior benestar dos veciños e veciñas, fomentando a participación e estilos de vida saudables.

O alcalde de Ames, Blas García, destacou que “é un gran recoñecemento para o Concello de Ames recibir premios por servizos que estamos a prestar. Este é un recoñecemento ao un proxecto que aposta por un estilo de vida saudable para veciñanza de Ames. O programa Ames Saudable engloba moitos servizos e actividades, que están desenvolvéndose actualmente e que tamén xa veñen de atrás. Este é un premio no que se recoñece unha boa práctica, para que a teñan en conta outros concellos”. Tamén tivo palabras de agradecemento para o anterior alcalde e actual delegado do Goberno en Galicia, Jose Miñones, xa que "foi el o que tivo a iniciativa de presentar o programa Ames saudable a ditos premios”.

A Asamblea Xeral da Rede Española de Cidades Saudables e mailo acto de entrega dos III Premios de Calidade desenvolveuse esta mañá no salón de actos do Colexio Oficial de Arquitectos de Madrid. Previamente na xornada de onte, a concelleira de Benestar Social e Promoción da Saúde, Luísa Feijóo, e maila técnica de Promoción da Saúde, Rosana Martínez, participaron na IX Xornada de implementación local da estratexia de promoción da saúde e prevención no SNS. En dita xornada houbo diferentes presentacións estre as que destacan a guía para planificar cidades saudables; estratexia estatal da bicicleta; impulso á renaturalización urbana en España; así como diferentes experiencias municipais.

Fomento de estilos e hábitos de vida saudable
A concelleira de Benestar Social e Promoción da Saúde, Luísa Feijóo, explicou que “este programa comezou cunha reformulación da Concellería de Sanidade dotándoa de contido e vinculando a técnica en nutrición a este servizo. Con este cambio conseguimos darlle un papel específico na promoción da saúde, en prevención, tratamento e a rehabilitación de enfermidades, a través tanto dunha alimentación saudable como da realización de actividade física e a prevención de consumos, o cal sen dúbida redunda nun beneficio na saúde física e emocional individual e colectiva da nosa poboación. Desta forma, dáse paso á figura actual con funcións vinculadas á saúde pública (prevención e promoción da saúde), actuando sobre a poboación en xeral e coordinando dun xeito totalmente transversal as diferentes accións, e sobre todo garantindo que toda poboación, e en especial aquela que conta con menos recursos, poidan acceder a esta atención. Dende o departamento de Promoción da Saúde traballamos sempre dende a perspectiva de alcanzar a equidade en saúde”.

Ademais, Luísa Feijóo engadiu que “este premio é un gran recoñecemento ao traballo levado a cabo dende a Concellería de Promoción da Saúde nestes anos e mais se temos en conta que foi concedido por unha Rede que representa a 25 millóns de persoas, recoñecéndoo como unha boa práctica no fomento de estilos e hábitos de vida saudable. Un recoñecemento que compartimos co monitorado que é parte esencial das nosas actividades e sobre todo con todas as persoas que participan delas, facendo que este proxecto vaia medrando día a día e que nos dá impulso e forzas para seguir innovando, programando e traballando para seguir dando ferramentas para mellorar a nosa saúde física e emocional”.

Novas relacionadas:

El Correo Gallego: "Premio Nacional de Calidad por los frutos del programa Ames Saudable"

AMS GO!: "O programa Ames Saudable consegue o Premio Nacional de Calidade 2021 para o Concello"