A concelleira de Deportes, Susana Señorís, sinala que “un ano máis está en marcha o Día do Deporte, unha iniciativa dirixida aos amesáns e amesás de todas as idades, que poderán gozar de propostas deportivas axeitadas a todos os gustos. Con esta xornada poñemos en valor a importancia de manterse activos e de realizar actividades saudables, e facemos fincapé no compromiso que existe cos clubs do noso concello”.

A veciñanza poderá gozar de actividades dirixidas como aerozumba, spinning ou baile moderno, así como de piragüismo, atletismo, xadrez, tenis, golf e crocket, patinaxe, baloncesto, fútbol sala, judo e taekwondo. As persoas que participen en cinco desas actividades recibirán un agasallo na carpa de participación.

Trátase dunha xornada de actividades lúdicas que melloran a calidade de vida de quenes practican estes deportes. Ademais, non só é beneficioso para pór en forma o corpo, senón tamén para prever enfermidades como as coronarias, e incrementar a autoestima e o optimismo. Todas as persoas interesadas en realizar un deporte pero que aínda non saben por que disciplina decantarse, teñen a ocasión ideal de probar e escoller a que máis lles guste no Día do Deporte de Ames.

Actividades do Día do Deporte
A quinta edición do Día do Deporte terá lugar este sábado, 9 de setembro, na área deportiva do Milladoiro. Ofrécese unha extensa oferta deportiva que se ofertará ao longo de tres horas, repartidas en horario de mañá, de 11:00 a 14:00 horas.

Deste xeito, no aparcadoiro da área deportiva terán lugar as actividades dirixidas: aerozumba (de 11:45 a 12:30 horas), spinning (de 12:30 a 13:15 horas) e baile moderno (de 13:15 a 14:00 horas). Por outro lado, na piscina descuberta haberá piragüismo, de 11:00 a 14:00 horas, mentres que na pista exterior se desenvolverán actividades de atletismo (de 13:00 a 14:00 horas).

Tamén haberá xadrez, de 12:00 a 14:00 horas, na entrada do pavillón; e tenis, de 11:00 a 13:00 horas, na pista exterior. O golf e o crocket impartiranse de 12:00 a 14:00 horas na zona verde, mentres que a patinaxe terá lugar de 11:00 a 12:00 horas no pavillón polideportivo. No mesmo emprazamemento haberá baloncesto, de 12:00 a 14:00 horas.

A actividade de fútbol sala desenvolverase na pista de fútbol sala, de 12:00 a 13:00 horas; e o judo será de 13:00 a 14:00 horas, no ximnasio do pavillón. Para rematar, tamén no ximnasio, haberá judo, de 11:00 a 12:00.

Todas as persoas que participen en, polo menos, cinco actividades, recibirán selos que lles permitirán recibir un agasallo na carpa de organización.